Аҥаардас «Азия оҕолоругар» 1,4 млрд солк. суумалаах кэһии

Кулун тутар 25 күнүгэр буолбут Ил Түмэн 18-с пленарнай мунньаҕар СӨ Ааҕар-суоттуур палаататын (мантан салгыы – АСП) 2025 сыллааҕы үлэтин түмүгүн бэрэссэдээтэл Алена Федорова иһитиннэрдэ. Бу туһунан Ил Түмэн пресс-сулууспата тугу суруйбутун салгыы билсиэҕиҥ.

Ордук улахан айдаан, резонанс да диэххэ сөп, VIII Норуоттар икки ардыларынааҕы «Азия оҕолоро» успуорт оонньуутугар бэлэмнэниигэ сыһыаннаах. Бэрэбиэркэ көрдөрбүтүнэн, 1,4 млрд солк. кэһии Контракт тиһигин туһунан сокуоҥҥа сыһыаннаах: контракт сулууспата суох, атыы (закупка) өлүүскэлээн ыытыллыбыт, күрэстэһии хааччахтаах барбыт. Успуорт министиэристибэтин биэдэмэстибэннэй тэрилтэлэрэ уопсайа 8,9 мөл. солк. суумалаах үбү аналынан туһамматахтара быһаарыллан, матырыйаал Сэлиэстийэлиир кэмитиэккэ уонна УФСБ ыытыллыбыт.

Аны, «Спорт – норма жизни» эрэгийиэн таһымнаах бырагырааманы бэрэбиэркэлээн, былааннаммыт эбийиэктэртэн баара эрэ 5,2%-на үлэҕэ киирбитэ быһаарыллыбыт. Уопсай бэрэбиэркэ судаарыстыбаннай сорудах көрдөрүүлэрин толорбокко, материальнай ночооту кыччатан туран, хамнас  пуондата үрдээн испитин быһаарбыт. Миниистиргэ 6 административнай боротокуол толоруллубут.