Аҕа дойду Улуу сэриитин бэтэрээнэ Кирилл Павлов 100 сааһын туолла!

Ытык бэтэрээни чиэстээри уонна кини өрөспүүбүлүкэбит уонна дойдубут сайдыытыгар киллэрбит сүҥкэн кылаатыгар махтанарга элбэх ыалдьыт, былаас бэрэстэбиитэллэрэ, бэтэрээннэр уонна уопсастыбаннас муһунна.

Дьокуускай куорат баһылыга Евгений Григорьев Кирилл Павлов Кыайыыны уһансыбыт көлүөнэ хорсун быһыытын уонна дьулуурун тыыннаах холобура буоларын бэлиэтээтэ.

Сүүс сааһын томточчу туолбутунан Кирилл Егоровичка «Үйэ саас» СӨ уһун үйэлээхтэрин бочуоттаах бэлиэтэ туттарылынна. Кирилл Егорович мустубут дьоҥҥо ис сүрэҕиттэн махтанна уонна бу бэлиэ күҥҥэ кинини өйүүр-өйдүүр чугас дьоно-сэргэтэ элбэҕиттэн олус долгуйарын эттэ.

Бэлиэтээн эттэххэ, Кирилл Егорович Павлов Бүлүү улууһун Чочу нэһилиэгэр төрөөбүтэ. Кини — Аҕа дойду Улуу сэриитин кыттыылааҕа, Аҕа дойду сэриитин II истиэпэннээх уордьанын уонна Үлэ Кыһыл Знамята уордьан кавалера.

Бүгүҥҥү күҥҥэ кини уопсастыбаннай үлэтэ салҕанар: Саха Өрөспүүбүлүкэтин Ытык Сүбэтин чилиэнэ, өрөспүүбүлүкэ, Дьокуускай куорат уонна Бүлүү улууһун Ытык гражданина.