9 №-дээх оҕо спордун оскуолатыгар фитнескэ маастар-кылаас буолан ааста

Дьокуускай куорат Сайсары түөлбэтигэр быйыл саҥа тутуллубут 9 №-дээх оҕо спордун оскуолатыгар Москваттан фитнес-тренер Олеся Васильева сүһүөххэ, тоноҕос уҥуоҕар туһалаах уонна массаас тиэхиньикэтигэр үөрэтэр маастар-кылааһы ыытта.
Тренер Олеся Васильева Дьокуускайтан төрүттээх. Ол иһин сыл аайы төрөөбүт дойдутугар кэлэн, араас хайысхалаах маастар-кылаастары ыытар. 
«Чөл олоҕу тарҕатар сыалтан Дьокуускай куорат Олохтоох дьаһалтатын кытта кэнэҕэһин даҕаны маннык хабааннаах дьарыктары ыытары былаанныыбыт, Дьокуускайга фитнес-индустрия сайдарыгар үлэлиибит», - диир Олеся Васильева.
Бэлиэтээн эттэххэ, Ильменскэй уулуссаҕа тутуллубут саҥа «Чыпчаал» 9 №-дээх Оҕо спордун оскуолатын дьиэтэ «Демография» нацбырайыагынан, «Саха Өрөспүүбүлүкэтигэр физическэй култуураны уонна спорду сайыннарыы» судаарыстыбаннай уонна «2017-2032 сылларга Дьокуускай куорат социальнай инфраструктуратын кэлимник сайыннарыы» муниципальнай бырагыраамаларынан ааспыт сайын VIII-c «Азия оҕолоро» Оонньуулары көрсө үлэҕэ киирбитэ. Ол туһунан Олохтоох дьаһалта пресс-сулууспата иһитиннэрэр.