87 сыл буолан баран көстүбүт

Бу туһунан СӨ Национальнай библиотекатын сүрүн библиотекара, грампластинкалар историяларын үөрэтиинэн дьарыктанар Сардаана Васильевна Алексееваны кытта кэпсэттибит.

– 1939 сыллаахха Марк Николаевич Жирков, Анна Денисовна Неустроева уонна Анна Егорова, Екатерина Захарова Москубаҕа санаторийга сынньана барбыттар. Бука, М.Н. Жирков көҕүлээһининэн буолуо диэн сабаҕалыыбыт. Ол сылдьан Апрелевскай собуокка бу грампластинкаҕа уһуллубуттар. Анна Егорова онно өссө араадьыйаҕа интервью биэрбитэ баар. Бу кэмҥэ аны ВДНХ «Говорящее письмо» диэн павильон арыллан, онно элбэх ырыаны ыллаабыт пластинкалара киэҥник тарҕаммыт. Кэлин Анна Егорова итинтэн икки пластинканы Опера уонна балет тыйаатырыгар биэрбитэ биллэр этэ.

Бу грампластинка көстүүтэ Москватааҕы Хаартыска уонна киинэ докумуоннарын пуондатын архыыбын кытта үлэлэһиибит түмүгэ буолбутуттан сүрдээҕин үөрэн олоробут. Хаартыскаттан көрдөххө, пластинка туруга үчүгэй курдук. Бу күннэргэ анаан баран, тутан-хабан, ырыаларын уһулан, Сахабыт сиригэр аҕалар былааннаахпын. Эппитим курдук, Марк Жирков көҕүлээһининэн ити 1939 сыллаахха уһуллаллар. Онтон 1946 эмиэ баран уһуллубуттара биллэр. Манна тыйаатыр режиссера Михаил Зиновьевич Бенедиктов салайааччылаах Анна Егорова, Григорий Кокшарскай, Анна Заболоцкая, Марфа Васильева барбыттар эбит.  Архыыпка Григорий Кокшарскай ырыата баар эбит. Салгыы аны атыттар уһуллубут ырыаларын буларга  үлэлэһэбин. Бу кэмҥэ, 1946 сыллаахха, кинилэр Дьокуускайдааҕы музыкальнай театр-студия  аатыттан барбыттар.

Анжелика Иванова, Е.А. Захарова-Саха Күөрэгэйэ аатынан Култуура дьиэтин дириэктэрэ:

– Дьэ, кырдьык, соһуччу үөрүүлээх сонуну истэн олоробут. Биир дойдулаахтарбыт Күннүк Уурастыырап  тылыгар Екатерина Захарова-Саха Күөрэгэйэ «Кэҕэ ырыатын» уһултарбыт пластинката баччаҕа диэри хараллан сыппыта, ол көстүбүтэ биһиэхэ харахпыт харатын курдук харыстыыр экспонат буоллаҕа. Түгэнинэн туһанан Национальнай библиотека сүрүн библиотекара Сардаана Васильевна Алексееваҕа махталбытын тиэрдэбит. Өрөспүүбүлүкэбит күнүгэр, өссө Култуура сылыгар көстүбүтэ – бэйэтэ ураты бэлиэ дии саныыбын.