80 сыл анараа өттүгэр бу күн

1942 сыл, олунньу 27 күнэ, бээтинсэ (уоттаах сэрии 251-с күнэ)

Калининскай фронт сэриитэ холмскай, велижскай, оленинскай ньиэмэс бөлөхтөрүн утары киирсиини салгыы ыытар уонна Ржев куорат хотугулуу-арҕаа уонна соҕуруулуу-арҕаа диэки Демидов куорат соҕуруу оройуоннарыгар өстөөхтөр улахан атаакаларын тохтото, тута сатыыр. Саратов уобалаһыттан сылдьар НКВД генерал-лейтенана Иван Иванович Масленников хамандыырдаах 39 А чаастара хаҥас флангаҕа ньиэмэстэр кимэн киириилэрин утары Ржев соҕуруулуу-арҕаа оройуонугар сэриилэһэр уонна сорох күүстэрэ Бители оройуонун – Шкурланы ылар иһин кыргыһаллар.

1943 сыл, олунньу 27 күнэ, субуота (уоттаах сэрии 616-с күнэ)

Хотугулуу-Кавказ фронугар, Черноморскай бөлөх бэйэтин флангатыгар кимэн киириигэ сэриилэһэр, оттон киин диэки сорохтор штурмовой этэрээттэрэ уонна разведка бөлөҕө бойобуой хамсаныылары ыытар. Хаҥас флангаҕа 56-с А уонна 47-с А сорох чаастара холбоһон Абин өрүскэ оборонаҕа сытар ньиэмэстэри кырган Абинскай станцияны ылаары соруммуттарын өстөөхтөр самнараллар.

1944 сыл, олунньу 27 күнэ, өрөбүл (уоттаах  сэрии 981-с күнэ)

2-с Прибалтийскай фронт сэриилэрэ бары хайысхаҕа салҕыы кимэн киирэллэр. Правофланговай 1-кы УА уонна 22-с А этэрээттэр ньиэмэстэргэ тохтобул биэрбэккэ уонна кирбиилэргэ оборона тэринэн кэтэспэттэрин курдук, инники сылдьар этэрээттэр Льста уонна Локня өрүстэригэр тахсаллар. Хаҥас флангаҕа 10-с Гв.А уонна 3-с УА, траншеяларга дьаныардаах түүҥҥү кыргыһыы кэнниттэн оборона инники балаһатыгар өстөөх үгүс чаастарын самнаран тутан сытар обороналарыгар иһирдьэ киирэллэр.

1945 сыл, олунньу 27 күнэ.
(уоттаах сэрии 1347-с күнэ)

Курляндскай эпэрээссийэ салҕанар, 6-с Гв.А уонна 51-с А, 2-с  Прибалтийскай фронт күүстэринэн. Либавскай хайысхаҕа кытаанах кимэн киириилэри салҕаан, Вартай өрүс арҕаа кытылыгар оҥоһуллубут ньиэмэстэр кирбиилэрин тоҕо анньан киирэргэ холоноллор. Кимэн киирээччилэр иккитэ атаакалыы сатыыллар да, өстөөхтөр күүстээх утарсыыларын көрсөн күн бүтүүтэ сорох учаастактарга эрэ  кыратык эмэтик иннилэрин диэки хамсааһын тахсар. 

Оттон Белорусскай фронт сэрииһиттэрэ эмиэ кимэн киириини салгыы ыыталлар, Хойниц (Польша) куоратын арҕаа диэки өттүгэр кимэн киирэн, өстөөх утарсыытын самнараллар. Померания сиригэр-уотугар биһиги байыастарбыт кимэн киирии оҥороннор, ньиэмэстэр обороналарын суулларан, олус суолталаах коммуникация узелларын уонна күүстээх опорнай пууннары былдьаан, ону таһынан күүстээх атаака түмүгэр 100-тэн тахса нэһилиэнньэлээх пууннары бас билэллэр.

Бреслауга биһиги байыастарбыт куораты төгүрүктээн сытар өстөөхтөрү кырган, 12 кыбаарталы ылаллар.

Бу күн бары фроннарга 29 ньиэмэс тааҥката суох оҥоһуллубут. Салгын киирсиилэригэр зенитнэй артиллерия өстөөх 6 сөмөлүөтүн суулларбыт.