+8 кыраадыһы тутуспакка абыраатылар

Хаһан эрэ, быдан өрдөөҕүтэ, оһоҕу оттууну, итиини биэриини таһырдьа температура +8 кыраадыс буоллаҕына биэрэргэ диэн уураах тахсыбыта. Сойуус үрдүнэн биир халыып кэмигэр, «биһиги килиимэппит, буорбут тымныы» диэн, ким даҕаны олохтоох усулуобуйаҕа сөп түбэһэр гына уларыттара сатаабатах быһыылаах.

Киһиэхэ, сүөһүгэ, үүнээйигэ итии-тымныы салгын дьайыытын үөрэппит уонна онно сөп түбэһиннэрэн градусник оҥорбут саха учуонайа Гавриил Угаров билимҥэ ситиһиитин аан дойду академията билиммит, бигэргэппит. Цельсия +8 кыраадыһа биһиэхэ +4 тэҥнэһэр эбит. Онон итиини +12 биэриэххэ диэн урут туруорса сатыыр этим.

Өрөспүүбүлүкэ бэрэсидьиэнэ Егор Борисов сылааһы биэриини дьиэ иһинээҕи температураҕа олоҕуруохха баара диэн эппиттээҕэ. Ону ким да иилэ хабан ылан, үлэлэһэн, уларытыы киллэрэ охсон бигэргэппэтэҕэ.

+15-17 кыраадыс сылааһы таас дьиэ истиэнэтэ иһирдьэ аһарбат, оттон сыбаайалара сиртэн тымныыны биэрэ турар буоланнар, тымныырҕатар, тоҥор эбиппит.

Хата быйыл куорат салалтата таһырдьа +15-17 кыраадыс турдаҕына сылааһы биэрэн, дьиэбит тымныы салгынын мүлүрүтэн абыраабыта. Итини мин олох хаачыстыбатын тупсарыы курдук сыаналаатым.