70 саастарын туолуохтаах дьон болҕомтотугар

Кыбартыыралаах хаһаайын 70 сааһын туолла да, хапытаалынай өрөмүөн иһин төлүүр усунуоһугар 50% компенсацияны туһанар бырааптанар. О.э. 70-80 саастаах кырдьаҕастар төлөөбүт төлөбүрдэрин аҥаара бэйэлэригэр төннөр.

Оттон 80 саастарын аастылар да, хапытаалынай өрөмүөҥҥэ төлөбүрдэрэ олоччу 100 бырыһыан компенсацияланар.

*Сүрүнэ, бу быраабы туһанар гына, хапытаалынай өрөмүөн төлөбүрүн кэмигэр оҥорор буолуохтаахтар.

Ону сэргэ: Кыбартыыра бас билээччитэ – кырдьаҕас бэйэтэ буолуохтаах. Холобур, кыбартыыратын оҕотун биитэр сиэнин аатыгар суруйтаран баран, онтугар бэйэтэ соҕотоҕун олорор да түгэнигэр, маннык компенсациянан туһанар кыаҕа суох.

Иккиһинэн, бу кыбартыыраҕа кинини таһынан үлэлиир кыахтаах киһи регистрацияламматах буолуохтааҕа ирдэнэр. Арай бэйэтин курдук үлэлээбэт биэнсийэлээҕи биитэр үлэлиир туруга суох 1 эбэтэр 2 группалаах инбэлиити кытта олорор буоллаҕына, компенсацияны ылар бырааптаах.

Компенсация анатарга пааспар наада. Электроннай сайабылыанньаны Судаарыстыбаннай өҥө порталыттан ыытыахха сөп: https://www.gosuslugi.ru/634464/1/form Бу туһунан сиһилии билсэргэ үөһэ суруллубут Ааҕыныстыба нүөмэригэр эрийэн билис.