58 мөл. солк. сыаналаах көмүһү хостооччулар тутулуннулар

Силиэстийэ быһаарбытынан, оперативниктар СӨ ИДьМ УЭБиПК уонна Өймөкөөн оройуонун полициятын үлэһиттэрэ Р-504 «Колыма» федеральнай суол 926-с км таһаҕас тиэйэр массыынаны тохтоппуттар. Массыына иһигэр икки эр киһи баар эбит: 48 саастаах Бурятия олохтооҕо уонна 35 саастаах Москва уобалаһыттан сылдьар учаастак начаалынньыга. Бирисиэпкэ вагончик баар эбит, онно оперативниктар кыһыл көмүстээх алта контейнеры булбуттар. Экспертиза быһаарбытынан, бу 6 кг тахса ыйааһыннаах шлиховой кыһыл көмүс, сыаната 58 мөлүйүөн солкуобайга тэҥнэһэр.

Быһаарбыттарынан, күндү металы Уус-Ньара бөһүөлэгиттэн 80 км тэйиччи Дириҥ Үрэх үрэххэ хостууллар эбит. Онно 2024 сыллаахха лицензията быһыллыбыт бэдэрээттээх тэрилтэ хампаанньатын сакааһынан сокуоннайа суох үлэлээбиттэр. Полиция үлэһиттэрэ уонна Айылҕа харыстабылын министиэристибэтин исписэлиистэрэ икки погрузчик, бульдозер, сууйар прибор уонна туга-кимэ биллибэт силиитэктэри былдьаабыттар. Пилота суох көтөр аал көмөлөрүнэн сокуоннайа суох хостооһун үлэтин барытын үөһэттэн устубуттар.

Күндү металлары сокуоннайа суох эргитии иһин холуобунай дьыала тэриллэн силиэстийэ салгыы ыытыллар.