579 киһи квотанан үлэ миэстэтин булла

Анал байыаннай дьайыы кыттыылаахтара 579 киһини өрөспүүбүлүкэ 282 тэрилтэтэ үлэҕэ ылла, диэн атырдьах ыйын 4 күнүгэр Бырабыыталыстыба Бэрэссэдээтэлин солбуйааччы Георгий Степанов иһитиннэрдэ.

Георгий Степанов бэлиэтээбитинэн, СӨ Нэһилиэнньэ дьарыктаах буолуутугар судаарыстыбаннай кэмитиэтин бирикээһинэн анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин үлэ миэстэтинэн хааччыйыыга 485 тэрилтэҕэ 885 квота тыырыллыбыт. Бүгүҥҥү күҥҥэ былаан 65 % туолбут.

Вице-премьер маны сэргэ үлэтэ суохтарга федеральнай бүддьүөт субвенциятыттын пособие төлөнөрүн эбэн эттэ.

Саха Өрөспүүбүлүкэтигэр анал байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр атын хайысхалаах көмө элбэх. Ол курдук, бүгүҥҥү күҥҥэ 192 ыалга гаас киллэртэрэргэ көмө оҥоһуллубут, 723 төрөппүт санаторийга сынньанан кэлбит, 541 киһи байыаннай сулууспалаах эмтэнэр сиригэр баран кэлбит, 18 киһи массыына ыытар быраап ылар үөрэх төлөбүрүн компенсациялаппыт.

1330 байыаннай сулууспалаах уонна 2509 кинилэр дьиэ кэргэттэрин чилиэннэрэ реабилитацияны ааспыттар, 449 киһи дьиэҕэ уонна тэйиччиттэн социальнай хааччыйыы өҥөтүнэн туһаммыт.

Дьарыктаах буолуу кииннэригэр 918 киһи, ол иһигэр 335 анал байыаннай дьайыы кыттыылааҕа уонна 583 кинилэр дьиэ кэргэттэрин чилиэннэрэ үлэҕэ наадыйан кэлбиттэр, онтон 170 киһи үөрэххэ барбыт, 564 киһи үлэ миэстэтинэн хааччыллыбыт, диэн Ил Дархан уонна Бырабыыталыстыба пресс-сулууспата иһитиннэрэр.