804 эдэр ыал 50-нуу тыһыынча солкуобайы ылла

Өйөбүл уопсай суумата 40,2 мөлүйүөн солкуобайга тэҥнэстэ. Иннинээҕи 2024 сылга өрөспүүбүлүкэ 940 ыала бу төлөбүрү оҥорторбута, уопсай суумата — 47 мөлүйүөн солк. этэ. Бу маннык өйөбүл дойду бэрэсидьиэнэ көҕүлээбит «Дьиэ кэргэн» итиэннэ «Ыччат уонна оҕолор» национальнай бырайыактар уонна «Биир ньыгыл Арассыыйа» баартыйа «Чэгиэн кэскил» бырайыактарын иитинэн оҥоһуллар.

Төлөбүр Арассыыйа гражданнарыгар, Саха сиригэр олорор, аан бастакытын ыал буолар (иккиэннэрин сааһа 25-тэрин ааспатах буолуохтаах) кэргэнниилэртэн биирдэстэригэр ананар.

Дьиэ кэргэн тустаах сайабылыанньатын сокуонунан холбоспутун кэнниттэн алта ый иһигэр социальнай көмүскэл уорганыгар эбэтэр e-yakutia.ru портал нөҥүө туттарар.

Манна даҕатан эттэххэ, быйылгыттан «Дьиэ кэргэн» өрөспүүбүлүкэтээҕи Ийэ хапытаала үһүс, төрдүс, бэһис уонна онтон кэлэр оҕо төрөөтөҕүнэ бэриллэр буолла.

25-гэр диэри саастаах эдэр кэргэнниилэргэ биирдэ бэриллэр төлөбүр Саха сирин баһылыгын ыйааҕынан киирбитэ. Харчыны ханнык баҕарар наадаҕа туттуохха сөп. Эдэр ыаллар, үгэс курдук, олорор усулуобуйаларын тупсарыыга, миэбэл, тиэхиньикэ атыылаһарга эбэтэр атын сыалга туһаналлар. Бырагыраама иллэрээ сылтан үлэлиир.