4 саастаах кыыс оҕо электросамокатынан хатааһылыы сылдьан уокка сиэттэ

Бу туһунан Саха сирин прокуратуратын уонна ИДьМ пресс-сулууспалара иһитиннэрдилэр.

Оҕо Дьокуускайга төрөппүттэрин кытта дьаарбайа барбыт. Аҕатын кытта хатааһылыы сылдьан, быстах кэмҥэ самокат аккумуляторын батареятыгар кылгас тиксиһии тахсан, тиэхиньикэ умайан тахсыбыт. Ол түмүгэр курданара 1-2 истиэпэннээх 2% уокка сиэтии диэн диагнозтаах балыыһаҕа киирбит.

Билигин туһааннаах бэрэбиэркэ ыытыллар. Полиция электросамокаттар умайыылара элбээн иһэрин туһунан сэрэтэр.

Электросамокаттар үрдүк киэлилээх литиевэй аккумулятор блоктаахтар, ол иһин оҥоһуулара кэбирэх. Оҥорон таһаарааччылар тиэхиньикэ иһигэр төһө кыалларынан элбэх блоктары биир ситимҥэ холбоон угаллар.

Айанныыр кэмҥэ охсуу, түһүү элбэх буолар, ол түмүгэр тырааныспар аллараа өттө (батареяларын онно угаллар) алдьаныан сөп. Оннук түгэҥҥэ кылгас тиксиһии тахсан, умайыан, оннооҕор дэлби тэбиэн сөп. Бу киһи өлүүтүгэр тиэрдиэн сөп.