39-с №-дээх оскуолаҕа «Төрүт эйгэ» баар буолла
Саҥа киин төрөөбүт дойду култууратын, литературатын уонна үгэстэрин үөрэтэр сыаллаах-соруктаах тэрилиннэ. Бырайыак Аҕа сүбэтин күүһүнэн, төрөппүттэр түмсүүлэрин өйөбүлүнэн олоххо киирдэ.
Үөрүүлээх тэрээһиҥҥэ Дьокуускай куорат Үөрэххэ управлениетын начаалынньыга Андрей Новоприезжай, оскуола дириэктэрэ Мария Прокопьева, оскуола төрөппүттэрин сэбиэтин бэрэссэдээтэлэ Венера Антонова, оскуола Аҕаларын сүбэтин бэрэссэдээтэлэ Дугуйдан Винокуров, ону сэргэ Аҕа сүбэтин бэрэстэбиитэллэрэ Андрей Ядрихинскай уонна Петр Тарабукин кытыннылар. Бу туһунан Үөрэх управлениета иһитиннэрэр.
Саҥа эйгэ уруогу таһынан дьарыктар, фольклорнай туруоруулар уонна чинчийэр бырайыактар түстэнэр сирдэрэ буолар аналлаах. Манна оскуола салалтата уонна Аҕа сүбэтэ эйгэни салгыы сайыннарар, архыып матырыйаалларынан хааччыйар, ону тэҥэ норуот маастардарын уонна суруйааччыларын кытта көрсүһүүлэри ыытар былааннаахтар.
Саҥа киин аһыллыыта төрөппүттэр түмсүүлэрин төрөөбүт дойду култуурунай нэһилиэстибэтин харыстыырга уонна эдэр көлүөнэҕэ тиэрдэргэ туһуламмыт көҕүлээһиннэрин чаҕылхай холобура буолла.
Сонуннар
Ордук ааҕаллар
