350 миэстэлээх уһуйаан тутуллуоҕа

Саҥа тутуллан, дьон олохсуйан кэҥээн эрэр “Севернай” дьоҕус оройуоҥҥа 350 миэстэлээх оҕо уһуйаанын тутуута быйыл саҕаланыаҕа. Ол туһунан СӨ Бырабыыталыстыбатын пресс-сулууспата иһитиннэрэр.

Икки мэндиэмэннээх, 5,6 тыһ. кв. м. тахса иэннээх тутуу бырайыактыыр докумуоннара билигин экспертизэни ааһан эрэллэр. Балаҕан ыйын саҥатыгар бэрэбиэркэни ааһан, сөбүлэҥ ылыллан, бэдэрээтчит үлэтин саҕалыыр былааннаах.

Саҥа уһуйаан Нам суолун 17 км баар дьоҕус оройуон уһуйааннарын ноҕоруускатын аччатарга төһүү буолуохтаах. Былаан быһыытынан, уһуйаан 2027 сыл ахсынньытыгар үлэлээн саҕалыахтаах.

Сакаасчыт - «Служба государственного заказчика РС(Я)» ГХТ, генеральнай бэдэрээтчит - «СОЮЗ» ИСК ХЭТ. Бырайыак олоххо киириитэ Дьокуускай сайдыытын маастар-былааныгар, “Дьиэ кэргэн” уонна “Олох инфраструктурата” национальнай бырайыактарга тирэҕирэр.