330,8 млрд солк. үс сыл иһигэр федеральнай бүддьүөттэн өйөбүл быһыытынан кэлиэҕэ
Ол туһунан «Якутия24» тэлэбиидэнньэ ханаалын «Актуальное интервью» биэриитигэр Саха сириттэн Госдуумаҕа дьокутаат Галина Данчикова иһитиннэрдэ.
Аҥаардас үөрэхтээһин эйгэтигэр кэлэр сылга 8 млрд солк. анаммыт. Чуолаан үөрэх кыһаларын, оҕо сайыҥҥы лааҕырдарын хапытаалынай өрөмүөнүгэр, тутуутугар 2025 сыллааҕар 672 мөлүйүөнүнэн элбэх үп көрүллүбүт. Кэлэр үс сылга маны таһынан оскуолаларга ИТ-инфраструктураны тэрийиигэ 518 мөл. солк. курдук кэлэрэ күүтүллэр.
Булгуччулаах медицинскэй страховкалааһын пуондата 2026 сылга 74 млрд солк. тахса үбү ылыаҕа. «Олох инфраструктурата» нацбырайыагынан 2026-2028 сылларга өрөспүүбүлүкэ уонна муниципалитеттар суолларын тутууга уонна тупсарыыга 53 млрд солк. бэриллиэҕэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.