31 №-дээх оскуола «Знание» уопсастыба куонкуруһун кыайыылааҕа буолла

Бүтүн Арассыыйатааҕы төрөппүттэр кэмитиэттэрин IV мунньаҕын быһаарыытынан дойду үрдүнэн 1 015 төрөппүт кэмитиэтэ, ол иһигэр Саха сириттэн 10 оскуола «Знание» уопсастыба ыыппыт күрэҕин кыайыылааҕынан тахсан, харчынан бириэмийэлэри тутуохтара.
Куонкурус бирииһин пуондата үс категорияҕа арахсар: 200-тэн 500 тыһ. солк. диэри; 500-тэн 1 мөл. солк. диэри; 1 мөл. солк. 2 мөл. солк. диэри.
Дьокуускай куорат 31 №-дээх оскуолата «Семейный слёт «Орлятский круг» бырайыага 2 мөл. солк. диэри кээмэйдээх категория кыайыылааҕа буолла. Ол курдук, оскуола сайыҥҥы «Каландаришвили» лааҕыра ырыа, үҥкүү бэстибээлин, маастар-кылаастары, анал аахсыйалары, күрэхтэһиилэри ыытыаҕа, психолог, логопед идэлээх исписэлиистэри кытта көрсүһүүнү тэрийиэҕэ, орлятскай ырыалар хомуурунньуктарын таһаартарыаҕа. 

Кыайыылаахтар ортолоругар Саха сириттэн Нам, Горнай, Алдан, Сунтаар, Чурапчы, Нерюнгри оройуоннарын үөрэх кыһалара бааллар.
Быйылгы куонкуруска саамай элбэх үлэ «патриотическай иитии» хайысхаҕа киирбит – 292. Үс ордук элбэх үлэлээх хайысхалар кэккэлэригэр итини сэргэ «духуобунас, сиэр-майгы өттүнэн иитии» – 214 уонна «эт-хаан өттүнэн иитии» – 191 киирэллэр. 
Кыайыылаахтар толору испииһэктэрин официальнай саайтка билсиэххэ сөп. Бириэмийэлэр бэс ыйын 30 күнүгэр диэри тиксэриллэн, бырайыактары олоххо киллэрии саҕаланыаҕа. 
Куонкурус тэрийээччитэ – Арассыыйа үөрэҕин министиэристибэтин өйөбүлүнэн «Знание» уопсастыба, диэн Ил Дархан уонна Бырабыыталыстыба пресс-сулууспата иһитиннэрэр.