304 диабеттаах оҕо өйдөөх харысхалланна

Билиҥҥи туругунан, куруук инсулин терапиятыгар наадыйар 304 эдэр пациены глюкозаны кэтээн көрөр аныгы систиэмэнэн хааччыйбыттар. Бу туһунан СӨ доруобуйа харыстабылын миниистирэ Лена Афанасьева иһитиннэрдэ.

Технологиятын сүрүн уратыта — ыарыһах тарбаҕын сотору-сотору ыарыылаахтык дьөлүүттэн букатыннаахтык аккаастанар кыахтанар. Ол оннугар оҕоҕо икки нэдиэлэҕэ биирдэ кыра сенсор, саннын кэннигэр туруораллар. Тэрил тохтоло суох глюкоза көрдөрүүлэрин кэтээн көрөн баран, дааннайы анал приборга тиэрдэр. Лена Афанасьева этэринэн, бу көннөрү тэрили биэрии буолбатах, ыарыыны хонтуруоллуур саҥа ньыманы олоххо киллэрии буолар, ол оҕо күн аайы элбэхтик бэрэбиэркэлээһинтэн үөскүүр кутталын суох оҥорор.

Систиэмэ уларыйыылары тута бэлиэтиир уонна саахар эмискэ түһэрин эбэтэр үрдүүрүн сэрэтэр, ол төрөппүттэр уонна быраастар суһал миэрэни ылалларыгар, оҕону ыарахан турукка тиэрдибэт кыаҕы биэрэр. Глюкозаны кэтээн көрөр тиһиктэри олоххо киллэрии «Уһун уонна көхтөөх олох» национальнай бырайыак чэрчитинэн тэриллэр. Бырагыраама федеральнай уонна эрэгийиэн бүддьүөттэрин суотугар толору үбүлэнэр, онон дьиэ кэргэттэргэ көмө букатын босхо оҥоһуллар.