«2б» кыбаарталы көһөрүү иккис түһүмэҕэ саҕаланна

Кулун тутар 7 күнүгэр СӨ баайга-дуолга уонна сир сыһыаннаһыыларыгар министиэристибэтин (МИЗО) саайта РФ Сиргэ кодексатын 56.5 ыстатыйатынан судаарыстыба туһатыгар тутуллар сир учаастактарын уонна онно турар эбийиэктэр испииһэктэрин таһаарда: https://minimush.sakha.gov.ru/news/front/view/id/3486154
Дьаһал Дьокуускай куорат «2б» кыбаарталын кэлимник сайыннарыы чэрчитинэн ыытыллар тутуулары кытта ситимнээх. Испииһэккэ Пионерскай уул., 42, 44, 46, 48, 50, 52, Якутскай уул., 33 дьиэлэрэ, барыта 114 кадастровай нүөмэр киирбит.

Санатар буоллахха, «2б» кыбаарталы көһөрүү иккис уочарата «Спортивнай» саҥа түөлбэни тутууну кытта ситимнээх. Манан 7 элбэх кыбартыыралаах дьиэ уонна 107 кыбартыыра хабыллар (барыта 114 кадастровай нүөмэр).

Көһөрүү бастакы түһүмэҕэр 2023 сылга 5 дьиэ көтүрүллүбүтэ – Жорницкай уул., 40, 42, Пионерскай уул., 8/2 уонна Якутскай уул., 12, 14. Бу дьиэлэр оннуларыгар оҕо саада уонна спорт комплекса тутуллаллар.

Көһөрүү 2030 сылга диэри биэс түһүмэҕинэн ыытыллар. 
СӨ баайга-дуолга уонна сир сыһыаннаһыыларыгар министиэристибэтин саайта маны сэргэ сиһилии информацияны ылар туһааннаах аадырыстары таһаарда:
* «Өрөспүүбүлүкэтээҕи ипотека агентствота» АУо (РИА) – Дьокуускай к., Орджоникидзе уул., 17, 1 этээс, Көһөрүү отдела;
* СӨ баайга-дуолга уонна сир сыһыаннаһыыларыгар министиэристибэтэ – Дьокуускай к., Аммосов уул., 8., 3 этээс, Сир сыһыаннаһыыларыгар департамент;
Сир учаастагар, атын даҕаны хамсаабат баайга-дуолга быраабы учуоттуур туһунан сайабылыанньалары «Мои документы» бары офистарыгар туталлар, суһал линия нүөмэрэ: 8-800-100-22-16.
Сайабылыанньаны биэрии болдьоҕо: биллэрии киэҥ араҥаҕа тахсыбыта 60 хонук иһинэн.
Гражданнар уонна юридическай сирэйдэр бэрэстэбиитэллэрэ «2б» кыбаартал судаарыстыба туһатыгар тутуллар территориятын кыраныыссаларын бырайыагын билсэр аадырыстара:
* РИА, Дьокуускай к., Ойуунускай уул., 7, 1 этээс, 100 каб., бэнидиэнньиккэ 15:00-17:00 чч.
«2б» кыьаартал кыраныыссаларын бырайыагын кытта билсии болдьоҕо: биллэрии киэҥ араҥаҕа тахсыбыта 60 хонук иһинэн.
Судаарыстыба туһатыгар тутуллар сир учаастактарын туһунан кырдьыктаах информацияны СӨ баайга-дуолга уонна сир сыһыаннаһыыларыгар министиэристибэтин (https://minimush.sakha.gov.ru/) уонна Дьокуускай куорат Олохтоох дьаһалтатын (https://якутск.рф) официальнай саайтарыгар кэтиэххэ наада.
Бэлиэтээн эттэххэ, судаарыстыбаннай уонна муниципалльнай туһаҕа тутуллар сир учаастактарын быһаарар боломуочуйалаах уорганынан СӨ баайга-дуолга уонна сир сыһыаннаһыыларыгар министиэристибэтэ буолар (МИЗО): 677000, Дьокуускай к., Аммосов уул., 8., 3 этээс, Сир политикатыгар департамент, диэн иһитиннэрэр СӨ баайга-дуолга уонна сир сыһыаннаһыыларыгар министиэристибэтин саайта.