2800 киһи тыа хаһаайыстыбатыгар өр сыллаах үлэтин иһин үрдэтиллибит биэнсийэни ылар

2,8 тыһыынчаттан тахса киһи тыа хаһаайыстыбатын эйгэтигэр үлэлээбитин иһин үрдэтиллибит биэнсийэни ылар, диэн Арассыыйа Социальнай пуондатын Саха сиринээҕи салаатын салайааччыта Марина Герман кулун тутар 18 күнүгэр брифиҥҥэ эттэ.
Ол курдук, Арассыыйа Социальнай пуондатын Саха сиринээҕи салаата тыа хаһаайыстыбатын эйгэтигэр 30 сылтан итэҕэһэ суох үлэлээбит уонна биэнсийэҕэ эбии ааҕыы оҥоһуллар кэмигэр тыа сиригэр олорор үлэлээбэт биэнсийэлээхтэргэ биэнсийэҕэ эбии ааҕыыны оҥорор.
«Үрдээһин кээмэйэ сааһынан эбэтэр инбэлиитинэн страховой биэнсийэ олохтоммут кээмэйин 25% тэҥнэһэр. Ол 2025 сылга – 2 226 солк., үһүс группалаах инбэлииттэргэ – 1 113 солк. Эбии төлөбүр кээмэйин биэнсийэлээх судаарыстыбаннай өҥөлөр порталларыгар тус кэбиниэтигэр көрүөн сөп. Үрдэтиллибит биэнсийэ гражданин куорат сиригэр көһөн барбытын да кэннэ оннунан хаалар», – диэтэ Марина Герман.
Биэнсийэҕэ эбии төлөбүрү анатар бырааптаах дуоһунастар уонна исписээлинэстэр испииһэктэригэр 500 кэриҥэ идэ көрүҥэ баар, ол иһигэр механизатордар, аппараатынан ынах ыабыттар, тыа хаһаайыстыбатын тиэхиньикэтин өрөмүөнүгэр үлэлээбиттэр о.д.а. бааллар. Бэлиэтээн эттэххэ, 1992 сыл тохсунньу 1 күнүгэр диэри тыа хаһаайыстыбатын эйгэтигэр үлэ ыстааһа исписээлинэһиттэн, дуоһунаһыттан тутулуга суох ыстааска киирэр. Үрдэтиллибит биэнсийэни анатарга оҕону көрөн олорбут кэм, аармыйаҕа сулууспа, уоппуска, бүлүтүөн барыта учуоттанар. 
Марина Герман бэлиэтээбитинэн, биэнсийэҕэ эбии ааҕыыны оҥорторорго сайабыланньа ирдэммэт. Оттон гражданин страховой биэнсийэни анатар кэмигэр тыа хаһаайыстыбатын эйгэтигэр ирдэнэр үлэ ыстааһа ситэ илик түгэнигэр, Социальнай пуонда салаата эбии ааҕыыны 30 сыл үлэ ыстааһа туоллаҕына уонна биэнсийэлээх үлэлээн тохтоотоҕуна оҥорор. Маннык түгэҥҥэ Социальнай пуондаҕа сайабылыанньа бэриллэр, диэн иһитиннэрэр Ил Дархан уонна Бырабыыталыстыба пресс-сулууспата.