204 киилэлээх таас

Мария Борисова, пуонда сүрүн харайааччыта:

– Саха АССР үтүөлээх тутааччыта, «Аҕа дойдуга үтүөлэрин иһин» уордьан II истиэпэннээх мэтээлин кавалера, Арассыыйа айылҕатын харыстабылын Бочуоттаах үлэһитэ эколог Иван Иванович Андреев киһини сөхтөрөр күүһүн-уоҕун, спорка ситиһиилэрин туһунан кэпсиэм.

И.И. Андреев саха национальнай ыстаныыларыгар – кылыыга, куобахха, ыстаҥаҕа, мас тардыһыытыгар уонна троеборьеҕа Саха АССР спордун маастара. Эдэр сылдьан сахаҕа үрдүк уҥуохтаах (176 см), кэтит сарыннаах, күүстээх-уохтаах эр бэрдэ эбит. Ол курдук, 260 кг ыйааһыннаах штанганы анал дьарыга суох үс төгүл субуруччу тобугар диэри көтөхпүтэ биллэр. Латвияҕа сынньана сылдьан 345 кг өрө тардан, уҥа ытыһын тарбахтарынан 125 кг ыга тутан дьону сөхтөрбүт. Бу маннык ситиһиилэринэн норуокка Кытаанах Уйбаан диэн аатынан биллэрэ.

Биһиги түмэлбит пуондатыгар 204 кг таас харалла сытар. Тааһы 1973 сыллаахха Сиинэ үрэх кытыытыгар Иван Иванович өрө көтөҕөн таһааран 10 миэтэрэни барбыт. Уйбаан көтөҕөрүгэр бастаан бу таас 207 кг эбит.  1996 сыллаахха Бэрдьигэстээххэ аҕалалларыгар 3 кг эмтэрийбит эбит. Оттон 2001 сыллаахха түмэл пуондатыгар туттарыллыбыт. 1998 сыллаахха Бэрдьигэстээххэ буолбут мас тардыһыытыгар Саха сирин күүстээхтэрэ  түмсүбүттэрэ. Бу 204 кг тааһы көтөҕөргө холоммуттара.
Күрэхтэһиигэ таас көтөҕүүтүгэр Горнай улууһун Орто Сурт нэһилиэгиттэн төрүттээх мас тардыһыытыгар СӨ спордун маастара Петр Николаевич  Варламов кыайыылааҕынан тахсар.

Быйыл, 2026 сылга, 26 сыл буолан баран, Петр Николаевич түмэлгэ кэлэн бу көтөхпүт тааһын көрдө. Эдэр сааһын ахтан-санаан ааста.
Биһиги улууспутугар маннык күүстээх дьон баалларын туоһута бу сөҕүмэр тааһы түмэлгэ кэлбит ыалдьыттарбыт сөҕө-махтайа көрөллөр.