203-с түөлбэ тыын суолталаах боппуруостарын дьүүллэстилэр

Манна кыбартаал иһинээҕи суол-иис мөлтөҕө, парковка миэстэтэ тиийбэт кыһалҕата таарылынна, ону тэҥэ сорох суол кэрчиктэрин муниципальнай көрүүгэ-истиигэ биэрии кыаҕын, о.д.а. дьүүллэстилэр.

Мунньахха куорат баһылыгын солбуйааччы Алексей Гарагуля, Дьокуускай куорат Дууматын бэрэссэдээтэлэ Альберт Семёнов, дьокутааттар Наталья Луковцева, Кирилл Соболев уонна Владимир Ю, ону тэҥэ Олохтоох дьаһалта туһааннаах салааларын салайааччылара уонна түөлбэ олохтоохторо кытыннылар.

Саамай сытыы кыһалҕанан парковка миэстэтэ тиийбэтэ ааттанна. Тырааныспар элбэх буолан, массыыналар тиэргэннэри, ааһар суоллары баһылаан тураллара, ол айаны-сырыыны атахтыыра этилиннэ. Мунньах кыттааччылара ордук кыһалҕалаах сирдэргэ эбии парковка миэстэтин оҥоруу кыаҕын көрдүлэр, ону сэргэ инникитин түөлбэни сайыннарыыга бу боппуруоһу учуоттуур наадатын тоһоҕолоон бэлиэтээтилэр.

«Главстрой» тэрилтэ бэрэстэбиитэллэрэ этэллэринэн, хайыы үйэ олоххо киирэ турар бырайыакка билигин улахан уларытыылары киллэрэр табыллыбат: хантараак баттаммыт, үлэ номнуо түмүктэнэн эрэр. Куораты тутуу уонна архитектура департамена иһитиннэрбитинэн, олохтоохтор этиилэрэ 204-с түөлбэ сирин-уотун торумнуурга учуоттаныаҕа.

Куорат Дууматын бэрэссэдээтэлэ Альберт Семёнов бырайыагы оҥорууга нэһилиэнньэ санаатын эрдэттэн учуоттуур уонна олохтоохтор этиилэрин истэр наадатын бэлиэтээтэ. Кини этэринэн, инникитин парковка, суол, о.д.а. инфраструктура боппуруостарын бырайыагы оҥоруу түһүмэҕэр быһаардахха, итинник кыһалҕалар тириэхтэрэ суоҕа.

Мунньахха кэлбит түөлбэ олохтоохторо кыбартаал иһинээҕи ааһар суоллар кыараҕастарын, суоппардар тимир көлөлөрүн үлүбээй туруоралларын кэпсээтилэр, ол түмүгэр сорох сирдэргэ баһаарынай тиэхиньикэ уонна суһал көмө массыыната киирэр да кыаҕа суох буоларын эттилэр. Итини сэргэ айан сырыытын схематын уларытыы, суол бэлиэлэрин туруоруу уонна да атын миэрэлэр туһунан кэпсэттилэр. Бу боппуруоһу куорат Дууматын туһааннаах хамыыһыйатын көрүүтүгэр тиэрдэр былааннаахтар.

Аны туран, түөлбэ иһинээҕи сорох суол кэрчиктэрэ муниципальнай бас билиигэ суохтара этилиннэ. Кыттааччылар маннык учаастактары докумуоннааһын уонна кэлин муниципальнай көрүүгэ-истиигэ биэрэр наадатын дьүүллэстилэр. Онуоха бас билээччилэри кытта кэпсэтэн, ирдэнэр докумуоннары бэлэмниир сорук турар.

Маны таһынан, суол үлэтин кэнниттэн ууну ыытыы систиэмэтин тула боппуруос көтөҕүлүннэ. Исписэлиистэр ааҕан-суоттаан көрбүт дааннайдарын көрдөрдүлэр, ол эрээри систиэмэ хайдах үлэлиирин ардах түспүтүн кэннэ эбии сыаналыахтара.

Көһө сылдьар сүбэ мунньахха таарыллыбыт сүрүн боппуруостар боротокуолга тиһиллиэхтэрэ. Салгыы үлэ чопчу бэлиэтэммит хайысханан ыытыллыаҕа.