2028 сылга улуу тренер Д.П. Коркин 100 сааһын бэлиэтиэхпит

Үбүлүөйдээх тэрээһиннэр чэрчилэринэн спортивнай күрэстэр, саҥа тутуулар, улуу киһи аатын үйэтитэр дьаһаллар былааннаналлар.

Ил Дархан Айсен Николаев Чурапчыга тиийэ сылдьан улуус салалтатын кытта бу тиэмэ тула мунньахтаата. Кэпсэтии Д.П. Коркин аатын сүгэр эбийиэктэри тупсарыы, кини аатын үйэтитии, күрэстэри тэрийии тула буолла.

Былааҥҥа XIX төгүлүн ыытыллар Д.П. Коркин кэриэһигэр көҥүл тустууга Норуоттар икки ардыларынааҕы Гран-при турнир, Норуоттар икки ардыларынааҕы научнай-практическай конференция, тренердэргэ уонна судьуйаларга квалификацияларын үрдэтэр куурустар, өрөспүүбүлүкэтээҕи “Коркины үйэтитии нэдиэлэтэ”, Д.П. Коркин аатынан истипиэндьийэлэри анааһын, тренердэр методикаларын күрэһэ, ааттаах-суоллаах спортсменнар кыттыылаах маастар-кылаастар киирдилэр.

Маны таһынан тренер туһунан документальнай киинэ, үбүлүөйдээх бэлиэ, манньыат уонна почта маарката тахсыахтара, кинигэлэр уонна методическай босуобуйалар бэчээттэниэхтэрэ.

Дмитрий Коркин алын кылаастарга үөрэммит, олорбут сиригэр Булуҥ улууһугар түмэл арыллыаҕа. Чурапчыга интэринээттээх спорт комплекса тутуллуоҕа.