2027 сылга тутуллар эбийиэктэр быһаарылыннылар

Ол курдук, анал хамыыһыйа быһаарыытынан номнуо икки кыайыылаах бырайыак билиннэ:

I миэстэ – «Ытык сир» паарка иккис түһүмэҕэ «Дьол аартыга». Бу бырайыак иһин 14 080 куолас киирбит.

II миэстэ – Доруобуйа хаарыстабылын үлэһиттэригэр аналлаах сквер. Ааттаммыт бырайыакка 11 094 киһи куоластаабыт.

Гагаринскай уокурукка тутуллар «Дьол аартыга» этнокомплекс («Ытык сир» паарка 2-с түһүмэҕэ) сүрүннээн оҕо аймахха ананар. Ол курдук, сүрүн соругунан үүнэр көлүөнэни төрүт үгэстэргэ иитии буолар. Комплекс былаһын тухары остуоруйа дьоруойдарынан скульптуралар баар буолуохтара. Маны сэргэ анал куар-кодтары туһанан остуоруйалары ааҕыахха сөп буолуо.

Оттон Киин уокурукка тутуллар Доруобуйа харыстабылын үлэһиттэрин искибиэрэ үрүҥ халааттаах аанньалларга нэһилиэнньэ болҕомтотун тардар аналлаах. Уоттаах-күөстээх аркалар, декоративнай композициялар барыта кинилэргэ махтал бэлиэтэ буолуохтара. Анал инсталляциялар аныгы медицина ситиһиилэрин кэпсиэхтэрэ.

Быйылгы куоластааһыҥҥа ханнык эбийиэктэр киирбиттэрэй?

1. Доруобуйа харыстабылын үлэһиттэрин искибиэрэ

Аадырыһа: Киин уокурук

Куолас ахсаана: – 11 094;

2. «Собачье счастье» уопсастыбаннай туона

Аадырыһа: 202-с түөлбэ Куолас ахсаана: – 8 719;

3. 1941-43 сс. Ржев куорат иһин кыргыһыыга охтубут буойуннарга аналлаах искибиэр

Аадырыһа: Хабаров уул., 11

Куолас ахсаана: 1 881;

4. Сэргэлээх күөлүн кытыла

Аадырыһа: ДСК түөлбэтэ, Сэргэлээх күөлэ

Куолас ахсаана: 1 397

5. Алмаасчыттар искибиэрдэрэ

Аадырыһа: Сайсары уокуруга, Лермонтов уул.

Куолас ахсаана:  1 439;

6. Щорс күөлүн кытыла (1-кы түһүмэх)

Аадырыһа: Щорс күөлэ

Куолас ахсаана: 3 190 ;

7. «Дьол аартыга» этнокомплекс («Ытык сир» паарка 2-с түһүмэҕэ)

Аадырыһа: Гагаринскай уокурук

Куолас ахсаана: 14 080

8. Речниктэр искибиэрдэрэ

Аадырыһа: Губинскай уокурук, Бестужев-Марлинскай уул., 2

Куолас ахсаана: 1 718;

9. 203-с түөлбэҕэ кытылы тупсарыы

Аадырыһа: 203-с түөлбэ

Куолас ахсаана: 2 280.

Хаалбыт бырайыактар бары резервэҕэ киирэллэр. 

Санатар буоллахха, бу иннинэ киин куорат баһылыга Евгений Григорьев Дьокуускай куоракка сүктэриллибит былаан лаппа үрдээбитин этэн турар. Ол курдук, өскөтүн былырыын бары бырайыактарынан уопсайа 34 тыһыынча куолаһы киллэрэр сорук турбут буоллаҕына, быйыл былаан 30% үрдээн, 45 тыһыынчаҕа чугаһатыллыбытын иһитиннэрбитэ. Евгений Григорьев манан сибээстээн Дьокуускай куоракка тутуллар эбийиэктэри үбүлээһин кээмэйин үрдэтэргэ регион бырабыыталыстыбатын кытта үлэни ыытарга соруйбута. Дьокуускай куорат олохтоохторо бу бырайыакка өрүү буоларын курдук көхтөөхтүк кыттан, былааннаммыт 45 тыһыынча кэриҥэ куолас киирэрин хааччыйбыттара.

«Куорат сиригэр табыгастаах эйгэни тэрийии» бырайыак көмөтүнэн Дьокуускай куоракка 2018 сылтан 11 уопсастыбаннай туона оҥоһулунна. Бу барыта – куорат олохтоохторо көхтөөхтүк куоластаабыттарын түмүгэ. Ол иһигэр былырыын Гагарин искибиэрин уонна Таалай күөлгэ «Обнаженные сердца» оҕо былаһааккатын бырайыактара муҥутуур элбэх куолаһы ыланнар, быйыл үлэҕэ киириэхтээхтэр.

Куоластааһын муус устар 21 күнүттэн бэс ыйын 12 күнүгэр диэри ыытыллыбыта.