2027 сылга олоххо киирэр барыйыактарга куоластааһын хаамыыта

Дьокуускай куорат быйыл куоластааһыҥҥа тоҕус уопсастыбаннай туонаны киллэрбитэ. Ыам ыйын 15 күнүнээҕи туругунан инники күөҥҥэ "Собачье счастье" (6587) бырайыак бастаан испит буоллаҕына, бүгүҥҥү, ыам ыйын 25 күнүн 14.30 ч. туругунан 8704 куоластаах Доруобуйа харыстабылын үлэһиттэригэр аналлаах сквер инники күөҥҥэ тахсан турар. Cэргэлээх күөлүн кытылын (ДСК оройуона) тупсарыы сол курдук кэнники миэстэҕэ турар (ыам ыйын 15 күнэ - 709, ыам ыйын 25 күнэ - 1018). Атын бырайыактарга куоластааһын хаамыыта хайдаҕый?

"Киин куорат" өссө төгүл быйыл ханнык бырайыактарга куоластыырбытын санатар. 

1. Доруобуйа харыстабылын үлэһиттэрин искибиэрэ

Доруобуйа харыстабылын үлэһиттэрин искибиэрэ күннэри-түүннэри дьон олоҕун, доруобуйатын туһугар охсуһар үрүҥ халааттаах аанньалларга нэһилиэнньэ болҕомтотун тардар аналлаах. Уоттаах-күөстээх аркалар, декоративнай композициялар барыта кинилэргэ махтал бэлиэтэ буолаллар. Анал инсталляциялар аныгы медицина ситиһиилэрин кэпсиэхтэрэ.

Аадырыһа: Киин уокурук

Куолас ахсаана: 8704 (ыам ыйын 15 күнүгэр - 5624)

2. «Собачье счастье» уопсастыбаннай туона

Анал күрүөлээх-хаһаалаах туона түөрт атахтаах доҕоттору күүлэйдэтэргэ ааттаах миэстэ буолар аналлаах. Кинилэр манна ыраас салгыҥҥа сүүрүөхтэрин-көтүөхтэрин, снарядтарга дьарыктаныахтарын сөп.

Аадырыһа: 202-с түөлбэ

Куолас ахсаана: 7693 (ыам ыйын 15 күнүгэр - 6587)

3. 1941-43 сс. Ржев куорат иһин кыргыһыыга охтубут буойуннарга аналлаах искибиэр

1941-43 сс. Ржев куорат иһин кыргыһыыга охтубут Саха сириттэн буойуннарга аналлаах мемориальнай искибиэр үс соругу толорор: Охлопков, Петухов сырдык ааттарын кэриэстиир уонна тустаах пааматынньык зоната. Бу үс тиэмэни «хронология истинэтэ» ситимниир.

Аадырыһа: Хабаров уул., 11

Куолас ахсаана: 1532 (ыам ыйын 15 күнүгэр - 1293)

4. Сэргэлээх күөлүн кытыла

Бырайыак Сэргэлээх күөлүн кытылын тупсарыы бастакы түһүмэҕэ буолар. Бэлисипиэт парковката, атыы-эргиэн павильоннара (кафе), анал сибэкки үүннэрэр миэстэлээх ыскамыайкалар, хачыаллар, муоста кытта баар буолуохтарын сөп. Территориятын иэнэ скейтинг былаһааккатын, волейбол, баскетбол оонньуур миэстэлэри, аһаҕас халлаан анныгар спордунан дьарыктанар, оҕо оонньуур былаһааккаларын, фонтан кытта туруорар кыаҕы биэрэр. Сынньанааччылар ууга киириэхтэрин, амфитеатрга ыытыллар тэрээһиннэргэ кыттыахтарын, тыы уларсан хатааһылыахтарын сөп.

Аадырыһа: ДСК түөлбэтэ, Сэргэлээх күөлэ

Куолас ахсаана: 1018 (ыам ыйын 15 күнүгэр - 709)

5. Алмаасчыттар искибиэрдэрэ

Бырайыак Саха политехническэй лиссиэй (14№-дээх оскуола) таһыгар баар Алмаасчыттар искибиэрдэрин өрөмүөнүн туруорсар. Олоххо киирэр түгэнигэр, куорат олохтоохторо, ордук чуолаан оскуола оҕолоро, дьаарбайар, айылҕалыын алтыһар табыгастаах туоналанар кыахтаахтар.

Аадырыһа: Сайсары уокуруга, Лермонтов уул.

Куолас ахсаана:  1184 (ыам ыйын 15 күнүгэр - 898)

6. Щорс күөлүн кытыла (1-кы түһүмэх)

Щорс күөлүн кытылыгар оҕо оонньуур, спордунан дьарыктанар аныгылыы көхтөөх сынньалаҥ зоната тэриллиэн сөп. Бырайыак биир киэргэлинэн пирс буолуоҕа, маны сэргэ сатыы, бэлисипиэттээх дьоҥҥо анал суоллар баар буолуохтара.

Аадырыһа: Щорс күөлэ

Куолас ахсаана: 2558 (ыам ыйын 15 күнүгэр - 1763)

7. «Дьол аартыга» этнокомплекс («Ытык сир» паарка 2-с түһүмэҕэ)

Бырайыак сүрүннээн оҕо аймахха ананар. Ол курдук, сүрүн соругунан үүнэр көлүөнэни төрүт үгэстэргэ иитии буолар. Комплекс былаһын тухары остуоруйа дьоруойдарынан скульптуралар баар буолуохтара. Маны сэргэ анал куар-кодтары туһанан остуоруйалары ааҕыахха сөп буолуо.

Аадырыһа: Гагаринскай уокурук

Куолас ахсаана: 8481 (ыам ыйын 15 күнүгэр - 3007)

8. Речниктэр искибиэрдэрэ

Бырайыак концепцията айылҕаны уонна архитектураны биир уобараска түмэргэ дьулуһар. Бу санаа мас уонна уу өҥнөрүн дьүөрэлээһин нөҥүө ситиһиллэр уонна таас куорат олохтоохторун айылҕаҕа чугаһатарга дьулуһар.

Аадырыһа: Губинскай уокурук, Бестужев-Марлинскай уул., 2

Куолас ахсаана: 1137  (ыам ыйын 15 күнүгэр - 813)

9. 203-с түөлбэҕэ кытылы тупсарыы

Куорат биир кэрэ көстүүлээх миэстэтин тупсарыы бырайыагар сатыы дьаарбайар, бэлисипиэтинэн хатааһылыыр суоллар киирбиттэр. Хойуу мастаах, өлгөм сибэккилээх туона өҥүрүк куйааска күн сыралҕаныттан харыстыаҕа, сааскы-күһүҥҥү хахсаат тыалтан хаххалыаҕа.

Саҥа кытыл сүрүн киэргэлинэн үөһэттэн көрөр былаһаакка уонна амфитеатр буолуохтара. Оҕо оонньуур, спорт былаһааккалара аныгы оборудованиенан хааччыллыахтара. Даҕатан эттэххэ, спорт тээбиринэн уларсар пуун баар буолуоҕа.

Аадырыһа: 203-с түөлбэ

Куолас ахсаана: 1825 (ыам ыйын 15 күнүгэр - 995)

* * *

«Куорат сиригэр табыгастаах эйгэни тэрийии» бырайыак көмөтүнэн Дьокуускай куоракка 2018 сылтан 11 уопсастыбаннай туона оҥоһулунна. Бу барыта – куорат олохтоохторо көхтөөхтүк куоластаабыттарын түмүгэ. Ол иһигэр былырыын Гагарин искибиэрин уонна Таалай күөлгэ «Обнаженные сердца” оҕо былаһааккатын бырайыактара муҥутуур элбэх куолаһы ыланнар, быйыл тутуллаары тураллар.

Быйыл куоластааһыҥҥа киирбит 9 бырайыактан икки кыайыылаах 2027 сылга олоххо киириэхтэрэ.

Санатар буоллахха. Куоластааһын бэс ыйын 12 күнүгэр диэри zagorodsreda.gosuslugi.ru сайт нөҥүө ыытыллар.