2026 сылга Муусука үрдүкү оскуолатын саҥа куорпуһа үлэҕэ киирэр

Үс мэндиэмэннээх комплекс уопсай иэнэ 9,5 тыһыынча кв.миэтэрэ кэриҥэ. Үөрэнэр куорпуһа 240 оҕоҕо суоттаммыт, интэринээтэ 150 миэстэлээх. Саҥа дьиэ кэнсиэртиир улахан саалалаах, бибилэтиэкэлээх, ырыа устар устуудьуйалаах, фонотека кэбиниэттээх, ону сэргэ спорт саалалаах буолуоҕа.

Ректор Надежда Зайкова иһитиннэрбитинэн, саҥа саала оскуола тэбэр сүрэҕигэр кубулуйуоҕа. Манна куорат олохтоохторугар уонна ыалдьыттарыгар анаан филармония муусукатын дьоро киэһэлэрэ тэриллиэхтэрэ.

Бэлиэтээн эттэххэ, 2011 сылтан Муусука үрдүкү оскуолатыгар оҕо филармониятын аҕыс кэлэктиибэ (икки оркестр, камернай ансаамбыл, скрипкаҕа, виолончельга, флейтаҕа, арфаҕа оонньооччулар ансаамбыллара уонна оҕо академическай хора) айымньылаахтык үлэлиир. Билигин саалалара суох буолан, кэккэ кыһалҕалары көрсөллөр, онон саҥа куорпус аһылларын бары да долгуйа күүтэллэр.

Бүгүҥҥү туругунан эбийиэккэ тутар-таҥар үлэ ыытыллар. Интэринээт өттүгэр түннүктэри туруоран бүппүттэр. Ону сэргэ инженернэй ситимин тардыы, о.д.а. үлэ салҕанар.