2026 сылга култуураҕа 27 земскэй үлэһити үлэнэн хааччыйарга былаанныыллар

Саха сирин култуураҕа уонна духуобунай сайдыыга министиэристибэтэ 2026 сылга “Култуура земскэй үлэһитэ” бырагыраамаҕа сайаапканы ылыыны биллэрдэ. Төлөбүр кээмэйэ 2 мөлүйүөн солкуобай.

«Биир ирдэнэр усулуобуйанан исписэлиис дуогабардаспыт сиригэр кырата биэс сыл үлэлииргэ эбэһээтэлистибэтэ буолар. Биир кэмнээх компенсация төлөбүрэ тустаах дуогабар түһэрсиллибит күнүттэн уон календарнай күн иһигэр оҥоһуллуоҕа», — диэн регионнааҕы култуура министиэристибэтэ иһитиннэрэр.

Бырагыраамаҕа кыттыан баҕалаах киһиттэн сайаапканы тохсунньу 12 күнүттэн муус устар 15 күнүгэр диэри туталлар. Муус устар 16 күнүттэн ыам ыйын 15 күнүгэр диэри сайаапканы анал хамыыһыйа көрөр уонна сүүмэрдээһин түмүгүнэн направление биэрэр. От ыйын 20 күнүгэр диэри кыайыылаахтар испииһэктэрин бигэргэтэр сокуоннай аакта тахсыаҕа, алтынньы 10 күнүгэр диэри култуура тэрилтэлэрин кытта үлэ дуогабара түһэрсиллиэҕэ, алтынньы 25 күнүгэр диэри биир кэмнээх компенсация төлөбүрүн хааччыйыыга дуогабардары түһэрсиэхтэрэ.

Санатар буоллахха, “Култуура земскэй үлэһитэ” бырагыраама дойду бэрэсидьиэнэ Владимир Путин сорудаҕынан 2025 сыл тохсунньу 1 күнүттэн үлэлээбитэ.