2026 сылга эдэр үлэһиттэргэ 810 куортамныыр дьиэ тутуллуоҕа

Бу Арассыыйа бэрэсидьиэнэ Владимир Путин сорудаҕынан оҥоһуллубут «Уһук Илиҥҥи федеральнай уокурукка чэпчэки сыанаҕа куотамҥа бэриллэр дьиэ» бырагырааманан кыаллар. Бырагыраама эрэгийиэн түргэтэтиллибит социальнай-экэнэмиичэскэй сайдыытыгар наадалаах квалификациялаах исписэлиистэри тардар уонна хаалларар сыалга туһуланар.

Өрөспүүбүлүкэҕэ уопсайа 1003 куортамҥа бэриллэр кыбартыыра тутуллара былааннанар. Билигин хайыы үйэ үс эбийиэк үлэҕэ киирбит: икки – Дьокуускайга, биир – Алдаҥҥа, манна 117 кыбартыыраҕа эдэр исписэлиистэр олороллор.

Куортамҥа бэриллэр кыбартыыралар аныгылыы өрөмүөннээхтэр, толору миэбэлинэн уонна тэриллэринэн хааччыллыбыттар. Устуудьуйа куортама ыйга 5 000 солк., оттон евро истииллээх икки хостоох дьиэлэр 11 000 кэриҥэ солкуобайдар, үс хостоохтор 15 000 кэриҥэ солкуобайдар (хомунаалынай төлөбүрдэри киллэрбэккэ).

Санатар буоллахха, Дьокуускайга “Уһук Илиҥҥэ чэпчэки сыанаҕа куортамҥа бэриллэр дьиэ” бырагырааманан Билибин уулуссатын 17 нүөмэригэр 14 этээстээх, 141 кыбартыыралаах дьиэ үлэҕэ киирбитэ. Сорохтор BILIBINO олорор дьиэ комплексын быһыытынан билэллэр. Бу дьиэҕэ 76 – биир хостоох, 52 – 2 хостоох, 13 үс хостоох кыбартыыра баара этиллибитэ. Силигин ситэрэн, куортамҥа бэриллэр дьиэлэр сантехниканан эрэ буолбакка, сүрүн миэбэлинэн, бытовой тиэхиньикэнэн хааччыллаллар! Дьиэ аттыгар хайаан да оҕо оонньуур былаһааккалаах буолар. Төһө иэннээх кыбартыыраны уларсаргыттан тутулуктанан, ыйдааҕы төлөбүр 5 тыһ. солк. 14 тыһ. солк. диэри халбаҥныыра этиллибитэ.