2025 сылга Саха сиригэр 8 култуура эбийиэгэ үлэҕэ киириэҕэ

2025 сылга Саха сиригэр үлэҕэ киирэр 8 култуура эбийиэгин ортотугар Дьокуускайга судаарыстыбаннай-чааһынай бииргэ үлэлэһии иитинэн олоххо киирэр Арктикатааҕы эпос уонна искусство киинэ баар.
Өрөспүүбүлүкэ Бырабыыталыстыбатын бэрэссэдээтэлин бастакы солбуйааччы Дмитрий Садовников туһааннаах биэдэмистибэлэр уонна муниципальнай тэриллиилэр салайааччыларын кытта мунньахха иһитиннэрбитинэн, дойду баһылыга Владимир Путин көҕүлээһининэн олоххо киирэр «Култуура» нацбырайыагынан былырыын сиппэтэх икки эбийиэк тутуллар – Мэҥэ Хаҥалас Аллараа Бэстээх бөһүөлэгэр Култуура киинэ уонна Сунтаар Кириэстээҕэр «Саргы түһүлгэтэ». Дмитрий Садовников бу икки эбийиэк графигы ситиһиитин кытаанах хонтуруолга ыларга уонна үлэһит илии ахсаанын элбэтэн биэрэргэ сорудахтаата.
Санатар буоллахха, «Култуура» национальнай бырайыагынан Саха сиригэр инники өттүгэр 7 култуура дьиэтэ үлэҕэ киирбитэ: Горнай Дьиикимдэтигэр, Уус Алдан Сыырдааҕар, Бүлүү Тааһаҕарыгар уонна Тыымпытыгар, Нам Аппааны бөһүөлэгэр, Сунтаарга Кэмпэндээйигэ уонна Чурапчы Толоонугар.
2025 сылга маны сэргэ 5 култуура эбийиэгэ «Моя Якутия в XXI веке» үтүө дьыала хамсааһынын чэрчитинэн тутулла турар: Үөһээ Бүлүү улууһун Быракааныгар Култуура уонна спорт комплекса, Үөһээ Дьааҥы Суордааҕар уонна Кэбээйи Батамайыгар элбэх функциялаах култуура кииннэрэ уонна Мэҥэ Хаҥалас Бөкө сэлиэнньэтигэр култуура уонна спорт комплекса.
Ленскэй куоракка муниципальнай оройуон сакааһынан Оҕо искусствотын оскуолатын дьиэтэ тутуллар, диэн иһитиннэрэр Ил Дархан уонна Бырабыыталыстыба пресс-сулууспата.