2025 сылга 361 кыбартыыра чэпчэки сыанаҕа куортамҥа бэриллиэҕэ
Быйыл Саха сирин үрдүнэн «Уһук Илиҥҥэ чэпчэки сыанаҕа куортамнанар дьиэ» бырагырааманан 361 кыбартыыра үлэҕэ киирэрэ күүтүллэр.
Ол курдук, Дьокуускайга – 141, Нерюнгри куоракка – 192 уонна Алдаҥҥа 28 кыбартыыралаах үс дьиэ тутуута түмүктэнэн эрэр, диэн СӨ тутууга министиэристибэтэ иһитиннэрэр.
«Уһук Илиҥҥэ чэпчэки сыанаҕа куортамнанар дьиэ» бырагырааманан 2024 сыл кулун тутар ыйыгар Дьокуускайга миэбэлинэн, бытовой тиэхиньикэнэн толору хааччыллыылаах бастакы 24 кыбартыыра үлэҕэ киирбитэ. Федеральнай киин уонна өрөспүүбүлүкэ бырабыыталыстыбатын өйөбүллэринэн куортам ыйдааҕы төлөбүрүн кээмэйэ 12 тыһ. солк. курдук.
Кэлэр 2026 сылга өссө 618 маннык кыбартыыра үлэҕэ киириэҕэ: 283 – Дьокуускай куоракка, 60 – Нерюнгрига, 117– Алдаҥҥа, 158 – Мииринэйгэ.
Бу бырагырааманан өрөспүүбүлүкэ үрдүнэн 2024-2026 сс. чэпчэки сыанаҕа куортамҥа бэриллэр 1003 кыбартыыра тутуллуоҕа: 448 – Дьокуускайга, 252 – Нерюнгрига, 158 – Мииринэйгэ уонна 145 – Алдаҥҥа.
Санатар буоллахха, «Уһук Илиҥҥэ чэпчэки сыанаҕа куортамнанар дьиэ» бырагыраама дойду баһылыга Владимир Путинынан 2022 сыллааҕы Илиҥҥи экономическай форум кэнниттэн көҕүлэммитэ. Сүрүн сыала – эдэр исписэлиистэри, устудьуоннары уонна сэдэх идэлээх, ордук наадалаах каадырдары чэпчэтиилээх усулуобуйаҕа олорор дьиэнэн хааччыйыы, диэн иһитиннэрэр Ил Дархан уонна Бырабыыталыстыба пресс-сулууспата.
Сонуннар
Ордук ааҕаллар
