2025 сылга 16 тыһыынча кэриҥэ киһи хаан туттарбыт

Итинтэн быһа холоон 10 тыһыынча – оройуоннарга, 6 тыһыынчаттан тахса – Дьокуускайга. Бу туһунан «Хаан кутар станция» ГБУ Саха сиринээҕи донордар каадырдарын комплектааһын салаатын сэбиэдиссэйэ Алена Филиппова иһитиннэрдэ.

“2024 сылы кытта тэҥнээтэххэ, бу 2 тыһыынчанан элбэх. Донордар хааннара тыһыынчанан дьон олоҕун быыһыырга көмөлөспүтэ”, – диэн кини бэлиэтээтэ.

Донор 18 сааһыттан, 50 киилэттэн тахса ыйааһыннаах уонна медицинскэй утары көрдөрүүтэ суох ким баҕарар буолуон сөп.

«Бочуоттаах донор» аат 40 уонна онтон тахса төгүл хаанын босхо туттарбыт гражданнарга иҥэриллэр.

Эр дьоҥҥо сылга 5-тэн тахса, дьахталларга 4-тэн тахса төгүл хаан туттарарга сүбэлииллэр.

Бочуоттаах донордарга чэпчэтии:

- сыллааҕы төлөбүр (2026 сылга – 10 тыһыынчаттан тахса солкуобай);

- медицинскэй тэрилтэлэргэ уочарата суох көрдөрүү;

- уоппусканы табыгастаах күҥҥэ талар кыах;

- санаторийга путевка атыылаһар ордук быраап.