20 сыл анараа өттүгэр: Кулун тутар ый

2016 сыл кулун тутар 2-3 күннэригэр Москваҕа Федерация Сэбиэтин салалтата регионнар СМИлэрин кылаабынай эрэдээктэрдэрин ыҥыран мунньахтаабыт. Саха сириттэн манна «Саха сирэ» хаһыат кылаабынай эрэдээктэрин солбуйааччы П. Попов, «Якутия» хаһыат кылаабынай эрэдээктэрэ В. Федоров, «Саха» НКИХ бэрэсидьиэнэ Х. Дьяконов, СӨ Бэрэсидьиэнин пресс-сэкирэтээрэ Дь. Иванов кыттыыны ылбыттар.

Кулун тутар 2-4 күннэригэр Германияҕа VII «Германо-Франко-Российский диалог-2006» экономика, промышленнас хайысхатыгар форум ыытыллар. Саха Өрөспүүбүлүкэтиттэн Бырабыыталыстаба Бэрэссэдээтэлин Бастакы солбуйааччы Г. Алексеев кыттан, регион социальнай-экономическай балаһыанньатын, инвестиционнай кэскилин туһунан сырдатар.

Кулун тутар 5 күнүгэр Ханты-Мансийскайга ыытыллыбыт боксаҕа Арассыыйа чемпионатыгар 51 кг ыйааһыҥҥа Георгий Балакшин бэһис төгүлүн Арассыыйа чемпионун аатын бигэргэтэр. Афанасий Поскачин 57 кг үрүҥ көмүс мэтээли иилинэр.

Кулун тутар 7 күнүгэр «Сахателеком» ААУо «Alkatel» аан дойду бөдөҥ хампаанньатын кытта телекоммуникация эйгэтигэр сөбүлэҥ түһэрсэр. Ол быһыытынан сыл бүтүөр диэри Дьокуускайга уонна Мииринэй куоракка NGN технология базатыгар аныгы көлүөнэ сибээс ситимин тардыахтаахтара.

Кулун тутар 14 күнүгэр YakutiaToday.com диэн английскайдыы сайт арыллар. Соруга – туристарга, урбаанньыттарга, көннөрү интэриэһиргээччилэргэ Саха сирин билиһиннэрии, көрдөрүү.

Кулун тутар 24-29 күннэригэр Тюмень куоракка XIV «Птенец-2006» оҕо биэриилэрин бэстибээлэ ыытыллар. Манна «Саха» НКИХ «Туллукчаан» биэриитэ «Саамай истиҥ биэрии» аатын ылар.

2006 сыл кулун тутар ыйыгар маны сэргэ Канада киинигэр Оттаваҕа Арктика регионнарын парламентарийдарын сис кэмитиэтин (ПКПАР) уочараттаах мунньаҕа ыытыллар. Арассыыйа дэлэгээссийэтин Федерация Сэбиэтин Бэрэссэдээтэлин солбуйааччы Михаил Николаев салайан илдьэ сылдьар. Тэрээһин кэнниттэн Михаил Николаев Исландия Өрөспүүбүлүкэтин парламенын бэрэссэдээтэлэ Сольвейг Петурсдоттир ыҥырыытынан Рейкьявикка сылдьан ааһар. Өрүттэр манна аан дойду хотугулуу-арктическай регионун кыһалҕаларын дьүүллэһэллэр.

М.К. Аммосов аатынан СГУ ректор А. Алексеев салайааччылаах дэлэгээссийэтэ Финляндия (Оулу), Швеция (Лулео, Умео) университеттарыгар уопут атастаһан кэлэр.

Нижний Новгород куоракка Настя Диодорова Арассыыйа аһаҕас чемпионатыгар уонна бастыыр иһин күрэхтэһиитигэр харбааһыҥҥа хас да дистанцияҕа бастаан, Арассыыйа чемпионун аатын ылар.

(“Республика Саха: 2006» кинигэттэн)