17-с №-дээх оскуола тутуута саҕаланна

Үөрүүлээх тэрээһиҥҥэ СӨ Ил Дархана Айсен Николаев, куорат баһылыга Евгений Григорьев, оскуола учууталлара, үөрэнээччилэрэ кытыннылар.

Айсен Николаев иһитиннэрбитинэн, эбийиэк 2027 сыл бүтүөр диэри үлэҕэ киириэҕэ.

«Саҥа куорпус 17-с оскуола дириҥ историятын салҕааһына буолуо уонна оҕолор үөрэнэллэригэр, айалларыгар уонна сайдалларыгар аныгылыы табыгастаах услуобуйа тэриллиэҕэ диэн эрэнэбин. Оскуола кэлэктиибин, үөрэнээччилэри, төрөппүттэри уонна выпускниктары тутуу саҕаламмытынан  эҕэрдэлиибин!» – диэтэ Ил Дархан.

Бэлиэтээн эттэххэ, 1920 сыллаахха аһыллыбыт киин куорат биир кырдьаҕас оскуолатыгар билигин балтараа тыһыынчаттан тахса оҕо үөрэнэр. Дьиҥэр, оскуола сүрүн дьиэтэ 350 миэстэлээх.

Саҥа куорпус тутулларын төрөппүттэр туруорсубуттара ыраатта. Ил Дарханы кытта быһа кэпсэтиигэ бу боппуруос иккитэ турбут.

Оскуола саҥа дьиэтэ «Ыччат уонна оҕолор» национальнай бырайыак «Бары үчүгэйи – оҕолорго» федеральнай бырайыагын олоххо киллэрии иитинэн «Биир ньыгыл Арассыыйа» өйөбүлүнэн тутуллуоҕа.