16 сыл анараа өттүгэр дьаһалта тугу отчуоттаабытый?

2025 сыл чахчылара

Бастаан 2025 сылга Дьокуускайга туох үлэ ыытыллыбытын билсиэххэ:

- элбэх оҕолоох дьиэ кэргэттэргэ 1638 сир учаастага түҥэтиллибит. 407 ыал харчынан ылбыт. СВО кыттыылаахтарыгар 862 сир учаастагын үллэрбиттэр. Ол үрдүнэн бүтэһик чахчыларынан уочаракка 7,5 киһи турар;

- дьиэни-уоту тутууга саҥа рекорд олохтоммут – уопсайа 415 тыһ.кв. миэтэрэ иэннээх дьиэ үлэҕэ киирбит.

- 1177 киһи хаарбах дьиэттэн көһөрүллүбүт;

- «Олох инфраструктурата» национальнай бырайыагынан 12 км суол өрөмүөннэммит, 2,5 км тротуар уонна 1 км усталаах бэлисипиэт суола оҥоһуллубут.

- 50 саҥа оптуобус ылыллыбыт уонна 10 саҥа сылаас тохтобул туруоруллубут. 2022 сылтан уопсайа 174 саҥа оптуобус атыылаһыллыбыт.

- 1 мөл.тахса сибэкки уонна 4 тыһ. кэриҥэ мас уонна ыарҕа олордуллубут.

2009 сыл чахчылара

Сир сыһыаннаһыыларын туһунан эттэххэ, ол саҕана элбэх оҕолоох дьиэ кэргэттэргэ сир учаастактарын түҥэтии саҕалана илигэ. Отчуокка ити сыл гражданнартан 8 371 сайабылыанньа киирбитэ, уопсайа 14 000 кэриҥэ сайабылыанньа хонтуруолга сытара ыйыллыбыт.

Дьиэ-уот тутуутугар киирдэххэ, ити сыл уопсайа 155 037 кв. миэтэрэ иэннээх 261 олорор дьиэ үлэҕэ киирбитэ бэлиэтэммит.

Итиннэ биир интэриэһинэй чахчыны буллубут: 2009 сыллаахха Жорницкай уонна Рыдзинскай уулуссаларыгар 16-с кыбартаалы кэлим тутуу үлэтэ түмүктэммит. 774 кыбартыыра тутуллубутуттан (42 930 кв. м)517 кыбартыыра (30 630 кв.м) “2009-2013 сс. Дьокуускай куорат бүддьүөт эйгэтин үлэһиттэрин дьиэнэн-уотунан хааччыйыы” бырагыраама кыттыылаахтарыгар тыырыллыбыт.

Хаарбах дьиэлэртэн олохтоохтору көһөрүү. “Переселение граждан из аварийного жилищного фонда” өрөспүүбүлүкэтээҕи аадырыстаммыт бырагырааманы олоххо киллэрии уонна 185 №-дээх “О фонде содействия реформированию жилищно-коммунального хозяйства” федеральнай сокуону толоруу чэрчитинэн Кузьмин уул., 32/2 уонна Петр Алексеев уул., 60 турар дьиэлэр олохтоохторо көһөрүллүбүттэр. Маныаха барыта 2 мөл. 775 солк. тыһ. үп көрүллүбүт.

Отчуот чахчылара кэпсииллэринэн, суол тутуута “2009-2013 сс. Дьокуускай куоракка сири-уоту кэлим тутуу” бырагыраама иитинэн олоххо киирбит:

- Өктөөп 50 сыла автострадаттан Сэбиэскэй Аармыйа 50 сыла уулуссатыгар диэри объездной суолу (Өктөөп 50 сыла автострадаттан Очиченко уулуссатыгар диэри суол кэрчигэ) тутуу бастакы түһүмэҕэ;

- Жорницкай уул. хапытаалынай өрөмүөнэ.

Уопсастыбаннай тырааныспары саҥардыы. 2009 сыллааҕы отчуокка “ЯПАК” тэрилтэ оптуобустарын саҥардыы салҕанарын туһунан суруллубут. “ЛиАЗ” мааркалаах 16 саҥа оптуобус ылыллыбыт. Бэлиэтээн эттэххэ, ити кэмҥэ “ЯПАК” МУТ уопсайа 76 оптуобустаах, куорат таһынааҕы 6 маршруту уонна 3 даачаҕа сылдьар маршруту хааччыйара ахтыллыбыт. Ол саҕана “Союз Авто” 658 оптуобустаах, куорат иһигэр 17 машрут үлэтин тэрийэр, күннэтэ 450-500 оптуобус сүүрэр эбит. 

Салгыы көҕөрдүү үлэтин сэһэргиир сыыппаралары сыныйан көрүөххэ. Ити сыл саас уонна күһүн 36 188 мас уонна 258 219 сибэкки олордуллубут. Дьиҥэр, 16 280 мас уонна 248 219 сибэкки былааннаммыт эбит. Ону куоһарбыттар. Чахчы, ол саҕана үрдүк көрдөрүү.