145 АБДь кыттыылааҕа үлэ булбут

Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин солбуйааччы Георгий Борисов иһитиннэрэринэн, дьарыктаах буолуу сулууспалара бэтэрээннэри уонна кинилэр чугас дьоннорун кытта ыкса үлэлэһэллэр. Сыл аҥаарыгар 794 АБДь кыттыылааҕа, 280 кинилэр дьиэ кэргэннэрин чилиэннэрэ үлэ миэстэтин булуу туһунан информацияны ылбыттар. 345 киһи үлэ буларыгар көмө көрдөөбүт, ол иһигэр 252 бэтэрээн. 51 киһи саҥа идэҕэ үөрэнэ сылдьар.

1293 бэтэрээн квоталаах миэстэҕэ үлэлии сылдьар. Олортон 663 – анал байыаннай дьайыы бэтэрээнэ.

Бэтэрээннэри үлэнэн хааччыйар тэрилтэлэргэ хас да субсидия көрүллэр. Бастакыта – АБДь кыттыылааҕын үлэлиир усулуобуйатын тэрийиигэ.  Иккиһэ – байыаннай дьайыы бэтэрээннэрин үлэҕэ ылыыны өйүүр көмө. Үсүһэ – I уонна II группалаах инбэлииттэргэ,  байыаннай дьайыыттан инбэлиит буолан кэлбит дьоҥҥо үлэлиир усулуобуйаны тэрийиигэ 200 тыһ. солк. көрүллэр.