1200 үөрэнээччи «Мин маҥнайгы идэм» бырайыагынан үөрэннэ
Саха сирин 1200 үөрэнээччитэ «Мин маҥнайгы идэм» бырайыагынан үөрэхтэрин ситиһиилээхтик түмүктээтилэр. Кинилэр манна ылбыт үөрүйэхтэрин, билиилэрин туоһулуур сэртипикээттэрин ылбыттарын туһунан өрөспүүбүлүкэ үөрэххэ уонна наукаҕа министиэристибэтэ иһитиннэрдэ.
Оҕолор ордук сэҥээрэр, наадыйар бырагыраамалара пилота суох авиационнай тиһик оператора, интэриниэт-маркетинг, нэһилиэнньэни сыыппараҕа үөрэтиини сайыннарарга үлэлэһэр консультант буоларын бэлиэтииллэр.
Арассыыйа үөрэххэ миниистирэ Сергей Кравцов Саха сиригэр кэлэ сылдьан «Мин маҥнайгы идэм» бырайыагы үрдүктүк сыаналаан турар. Билиҥҥитэ бу бырайыагы дойду атын эрэгийиэннэригэр киллэрэри былаанныыллар.
Санатар буоллахха, «Мин маҥнайгы идэм» эрэгийиэннээҕи бырайыак 2024 с. СӨ Ил Дархана Айсен Николаев «Саха Өрөспүүбүлүкэтин үөрэхтээһинин биир кэлим тиһигин 2030 сылга диэри сайыннарыы туһунан» стратегическай ыйааҕын олоххо киллэрии чэрчитинэн саҕаламмыта. Сүрүн сыалынан үөрэнээччилэр өрөспүүбүлүкэ орто уопсай үөрэхтээһинин бырагыраамаларынан үөрэнэр уонна идэтийэр кыахтарын үрдэтии буолар.
Манна сыһыаран бэлиэтээтэххэ, 2023 с. Саха сиригэр 2016 с. ыытыллар ИТ эйгэтигэр биир дьоһун, киэҥ хабааннаах Бүтүн Арассыыйатааҕы «Мин идэм – IT» куонкурус федеральнай таһымнаммыта. 9 сыл устата 25 тыһ. тахса кыттааччыны хаппыта, РФ Бырабыыталыстыбатын бэрэссэдээтэлэ Михаил Мишустин өйөбүлүн ылбыта.
Оттон 2024 с. бу куонкурус «Арассыыйа хакатоннара» национальнай бириэмийэ чэрчитинэн «Оскуола бастыҥ хакатона» ааттаммыта уонна РФ Үөрэххэ министиэристибэтин оскуола үөрэнээччилэригэр уонна устудьуоннарга ыытар олимпиадаларын уонна куонкурустарын официальнай испииһэгэр киирбитэ.
«Мин идэм – IT» эрэгийиэннээҕи операторынан СӨ урутаан сайдыыны бэлэмнээһин киинэ буолар. 2024-2025 үөрэх дьылыгар куонкурус Саха сирин араас муннугуттан 8 тыһ. тахса үөрэнээччини уонна устудьуону хаппыт.
Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.
Сонуннар
Ордук ааҕаллар
