11 киһи, ол иһигэр икки оҕо ууга былдьанна

Көрдүүр-быыһыыр водолазтар салааларын начаалынньыга Юрий Юргин эппитинэн, алдьархайдар үксүлэрэ куттал суох буолуутун быраабылатын кэһии түмүгэр тахсыбыттар. Ыам ыйыгар хас да булчут быыһыыр сэлиэччиги кэппэтэх эбэтэр сыыһа тимэхтэнэн, иилинэн ууга былдьаммыт. Биир быһылаан Алдан оройуонугар ыам ыйын 8 күнүгэр буолбут: эр дьон тыылара чөҥөчөккө анньыллан түҥнэстибит. Биирдэстэрэ быыһаммыт, оттон иккис киһи өлүгүн 22 чыыһылаҕа эрэ булбуттар. Чурапчы оройуонугар ыам ыйын бүтэһигэр оҥочоттон биир киһи түспүт, кинини көрдөөһүн билигин даҕаны салҕанар — уопсайа 92 тыһыынча квадратнай миэтэрэ түгэҕи чинчийбиттэр.

Ордук хараастыылаах түбэлтэлэринэн оҕолор өлүүлэрэ буолар. Сунтаар оройуонугар ыам ыйын 12 күнүгэр улахан дьон көрүүтэ-истиитэ суох хаалбыт 14 саастаах оҕо ууга түһэн өлбүт. Оттон бэс ыйын 6 күнүгэр Мииринэй оройуонун Арыылаах сэлиэнньэтигэр үстээх оҕо дьиэтиттэн баран өрүскэ киирэн ууга былдьаммыт.