100 бааллаах выпускниктарга – 100 тыһ. солкуобай 

СӨ Ил Дархана Айсен Николаев биир кэлим эксээмэҥҥэ 100 баалы ылбыт выпускниктарга 100 тыһ. солк. кээмэйдээх биир кэмнээх төлөбүрү уһатарын туһунан МАХ ситимҥэ иһитиннэрдэ.
«Бу өйөбүл миэрэтэ бэйэлэрэ үлэлээн, дьаныһан уонна талааннарынан муҥутуур үрдүк түмүгү ситиһээччилэргэ ананар. Хас биирдии сүүс баал улахан уонна дьоһун үлэнэн, билиинэн, характерынан, дьаныарынан, төрөппүттэр уонна учууталлар өйөбүллэринэн кэлэр», — диэн суруйда өрөспүүбүлүкэ баһылыга. 
Санатан эттэххэ, маннык төлөбүр Саха сиригэр 2022 сыллаахха киирбитэ. Бу сыллар тухары 87 выпускник ылла. Былырыын БКЭ-ни 15 киһи 100 баалга туттарбыта. Онтон түөрт выпускник икки эксээмэҥҥэ муҥутуур үрдүк көрдөрүүлэммитэ.