100 баалга туттарбыттар ахсааннара 30 тиийдэ!

В.П. Ларионов аатын ФТЛ үөрэнээччитэ Ярослав Белоусов баалын 76-тан 100-кэ диэри тупсарбыт. Өрөспүүбүлүкэтээҕи лицей выпускнига Эрчим Юмшанов 86 баалтан 100-кэ тиэрдибит.

Выпускник биир эксээмэни хаттаан туттарар, түмүгүн тупсарар кыах 2024 сылтан Владимир Путин көҕүлээһинэн киирбитэ.

Эрчим Юмшанов бу быраабынан туһанан, түмүгүн 14 бааллынан тупсарбыт буоллаҕына, Ярослав Белоусов бүтүн 24 (!) бааллынан тупсаран, өрөспүүбүлүкэ киэн туттар ыччатын ахсааныгар киирбиттэр. Уолаттары эҕэрдэлиибит! Туруоруммут сыалгытын ситиһэргэ бу курдук бары кыаҕы туһанан, иннигит диэки баран иһиҥ!

Инньэ гынан, Дьокуускай куорат оскуолаларын быйыл 100 бааллаах 7 выпускник түмүктээтэ, ол иһигэр В.П. Ларионов аатынан физика-тэхиньиичэскэй лицей уонна Дьокуускай куорат лицейэ иккилии 100 бааллаах үөрэнээччилээхтэр: Елизавета Рудых уонна Ярослав Белоусов – В.П. Ларионов аатынан физика-тэхиньиичэскэй лицей; Игорь Гуляев уонна Элиза Люйден – Дьокуускай куораттааҕы лицей; Полина Ерощенко – В.И. Кузьмин аатынан 30 №-дээх орто оскуола; Кирилл Малышев – Дьокуускай куорат 21 №-дээх орто оскуолата.

Кинилэр бары уонна бастыҥнары бэлэмнээбит учууталлара Дьокуускай куорат баһылыгын бириэмийэтин – 100 тыһыынча солкуобай – хаһаайына буолаллар.

 

Оттон Саха сирин оскуолаларын номнуо 30 (!) выпускнига БКЭ 100 баалга туттарда (былырыын – 15). Үгэс курдук сорох оскуолалар хастыы да 100 бааллаах оҕолоохтор. Кинилэр ортолоругар Өрөспүүбүлүкэтээҕи лицей-интэринээт 8 үөрэнээччини бэлэмнээбит, 3 үөрэнээччини – Чурапчытааҕы С.К. Макаров аатынан гимназия.