100 баалга – 28 үөрэнээччи!

Ол курдук, быйыл Саха сирин оскуолаларын 28 выпускнига БКЭ 100 баалга туттарда (былырыын – 15). Үгэс курдук сорох оскуолалар хастыы да 100 бааллаах оҕолоохтор. Кинилэр ортолоругар Өрөспүүбүлүкэтээҕи лицей-интэринээт 7 үөрэнээччини бэлэмнээбит, 3 үөрэнээччини – Чурапчытааҕы С.К. Макаров аатынан гимназия.

Маны таһынан Бүлүүтээҕи Н.Г. Чернышевскай аатынан профессиональнай-педагогическай колледж икки устудьуона демонстрационнай эксээмэҥҥэ муҥутуур үрдүк баалы ылбыт.

Саша Скрыбыкин, Дьокуускай куораттааҕы В.П. Ларионов аатынан ФТЛ 10-с кылааһын бүтэрдэ, английскай тылга Бүтүн Арассыыйатааҕы олимпиада призера:

– Англия тылын кытта билсиһиим 1 кылаастан, төрөппүттэрим бу тылы үөрэтэр куруһуокка суруйтарыахтарыттан саҕаламмыта. Ол күнтэн саҕалаан учууталларым Зиляра Викторовна (Дьокуускай куорат 7 №-дээх оскуолата) уонна В.П. Ларионов аатынан Физика-тэхиньиичэскэй лицейга кылааһым салайааччыта уонна английскай тыл учуутала Мария Юрьевна көмөлөрүнэн, өйөбүллэринэн бииртэн биир үрдэлгэ тахсан испитим. Кинилэр сүбэлэринэн куорат, өрөспүүбүлүкэ таһымнаах күрэхтэргэ үгүстүк кыттабын – эссе, Англия тыллаах дойдулар култуураларын билиигэ күрэхтэр, о.д.а.

Наука дьоҕус академията (МАН) ыытар эссе күрэҕэр сыллата кыттан, бастаан номинацияларга тиксэрим, онон иккис миэстэ буолбутум. Быйыл бастакы миэстэҕэ тахсан, Бүтүн Арассыыйатааҕы олимпиадаҕа Саха сирин оскуолаларын аатын көмүскээн кэллим.

Маны таһынан иллэҥ кэммэр бэйэм дьарыктанабын. Интэриниэттэн роликтары булан көрөбүн, ийэ тылларын илдьэ сылдьааччылары кытта кэпсэтэбин. Онон 10-с кылааска балайда баазалаах кэлбитим. Олимпиадаҕа  бэлэмнэнэрбэр МАН аҕыйах дьарыгы ыытар репетиторы анаабыта, уоннааҕытын бэйэм уонна учууталым Мария Юрьевнаны кытта дьарыктаммыппыт. Москваҕа олимпиадаҕа барарбар учууталым сорудахтары оннооҕор аэропорка киллэрэн биэрбитэ, сөмөлүөккэ олорор кэмҥэр дьарыктан диэн. Онно тиийэн олимпиадниктар бэйэ-бэйэлэригэр олус аһаҕастарын, хардарыта көмөлөсүһэллэрин, күөн былдьаһыы суоҕун үөрэ көрбүтүм.

Бу бастакы улахан ситиһиибин тапталлаах эһэм Скрыбыкин Александр Михайлович сырдык кэриэһигэр аныыбын.