10 сыл иһигэр – 15 социальнай эбийиэк

Кэлиҥҥи уон сылга киин куоракка сэбиэскэй кэм кэнниттэн саамай элбэх социальнай эбийиэк тутулунна. 7 оскуола, 5 оҕо саада, 2 эбии үөрэхтээһин тэрилтэтэ уонна култуура киинэ Дьокуускай куоракка судаарыстыба уонна чааһынай урбаан бииргэ үлэлэһиилэрин  түмүгэр баар буоллулар. 
Саамай элбэх, 12 эбийиэк, «Газэнергомонтаж» ХЭУо кытта сөбүлэһиилэри түһэрсии түмүгэр 2018-2019 сс. үлэҕэ киирбиттэрэ. Ол иһигэр «Айыы кыhата» национальнай оскуола, Аан дойдутааҕы Арктическай оскуола, Оҕо искусствотын оскуолата, Оҕо айымньытын киинэ, Ю.А. Гагарин аатынан Аныгы култуура уонна искусство киинэ бааллар.
СӨ экономикаҕа министиэристибэтигэр иһитиннэрбиттэринэн, бары эбийиэктэринэн төлөбүрдэр кэлэр сылга түмүктэнэллэр. 

Дьокуускай куорат баһылыга Евгений Григорьев бэйэтин телеграм-ханаалыгар (https://t.me/EvgenyGrigorev) бэлиэтээбитинэн, судаарыстыбаннай-чааһынай бииргэ үлэлэһии бырайыактарын олоххо киллэрии түмүгэр бүгүн Дьокуускай куоракка тыһыынчанан оҕо оскуолаҕа уонна уһуйааҥҥа эбии миэстэ таҕыста.
«Өрөспүүбүлүкэ уонна куорат салалталара 2010-с сыллар ортолоругар ылыммыт быһаарыылара инникилээҕин бириэмэ бэйэтэ көрдөрдө. Судаарыстыбаннай-чааһынай бииргэ үлэлэһии механизма тобуллубатаҕа буоллар, маннык элбэх социальнай эбийиэги кылгас кэм киһигэр олоххо киллэрэр уустук буолуо этэ», - диир Евгений Григорьев.

Бу курдук санааны билигин оҕону иитии уонна үөрэтии эйгэтигэр күннэтэ сыралаһар дьон эмиэ тутуһаллар.
Ол курдук, Н.Д. Неустроев аатынан SMART-библиотека дириэктэрэ Лада Кириллина алтыс сылларын киэҥ киэҥ, үс мэндиэмэннээх  дьиэҕэ үлэлии олороллорун, манна оҕолор эрэ буолбакка, улахан дьон кытта иллэҥ бириэмэлэрин сөбүлээн атааралларын бэлиэтиир. 
23 №-дээх «Цветик-семицветик» Оҕону сайыннарыы киинин дириэктэрин солбуйааччы Ольга Чемезова 1,5-тан 7-гэр диэри саастаах 800-чэкэ оҕону дьарыктыылларын, бассейн, фитобар, сенсорнай хос, лего, уруһуй, саахымат хосторо, логопед кабинета, оскуолаҕа бэлэмниир кылаас курдук бары наадалааҕынан хааччыллыылаах тэрилтэлээхтэрин, оҕолор манна күҥҥэ биэстэ иҥэмтэлээх аһынан хааччыллаллларын тоһоҕолуур. 

Галина Васильева, Дьокуускай куоракка саамай улахан, 990 миэстэлээх 40 №-дээх М.Е. Николаев аатынан оскуола дириэктэрэ (Оскуола «ПроШкола № 26» ХЭУо кытта тутуллубута):
– Аны күһүн балаҕан ыйын 1 күнүгэр арыллаары олоробут. Бары лабораторияларга, кылаастарга туһааннаах оборудование, компьютер таҥыллан турар. 33 кылаас баар буолуоҕа. Ол иһигэр педагог, медик, энергетик, программист идэтин талар баҕалаах оҕолорго анал кылаастар үлэлиэхтэрэ. Медблок, 540 миэстэлээх остолобуой, 288 миэстэлээх аактабай саала, икки спорт саалата, хореографическай саала, 90 миэстэлээх ааҕар саалалаах библиотека, рекреация, коворкинг-киин о.д.а. бэлэмнэр. Оскуолабытыгар доруобуйаларынан хааччахтаах дьоҥҥо табыгастаах эйгэ тэриллэн турар. Оскуола партнердарыттан биирдэстэринэн «Николаев-центр» диэн оскуолабыт аатын сүгэр Бастакы Бэрэсидьиэн Михаил Николаев архыып библиотеката буолар.

Ити курдук, судаарыстыбаннай-чааһынай бииргэ үлэлэһии көдьүүстээҕин көрдөрдө. Бу механизм кэлиҥҥи сылларга сылаас оптуобус тохтобулларын, уопсастыбаннай баанньыгы,  крематорийы тутуу эйгэтигэр туттуллар. «Кырдьаҕас куорат-2» бырайыак олоххо киириитэ эмиэ бу механизмҥа тирэнэр, диэн Олохтоох дьаһалта пресс-сулууспата иһитиннэрэр.