10 ийэни «Ийэ албан аата» анал бэлиэнэн наҕараадалаатылар

Арассыыйаҕа Ийэ күнүн чэрчитинэн киин куорат ийэлэригэр «Ийэ албан аата» анал бэлиэни туттардылар.

Дьокуускай куорат Олохтоох дьаһалтатын баһылыгын солбуйааччы Владимир Аржаков уонна Куорат дууматын дьокутаата Наталья Луковцева «Ийэ албан аата» анал бэлиэнэн наҕараадаламмыттары таһынан дьиэ кэргэн политикатыгар дьоһун кылааттарын киллэрбиттэргэ махтал суруктары туттардылар, диэн Куорат дууматын пресс-сулууспата иһитиннэрэр.

Куорат дьокутаата Наталья Луковцева бэлиэтээбитинэн, ийэ буолуу уопсастыба саамай үрдүк билиинитин ылыахтаах. Санатар буоллахха, «Ийэ албан аата» үрүҥ көмүс мэтээллээх уонна биир кэмнээх харчынан төлөбүрдээх наҕараада Дьокуускай куорат Дууматын 2013 сыл муус устар 24 күнүнээҕи РЯГД-55-5 №-дээх быһаарыытынан олохтоммута. 

Сыл аайы бу наҕарааданан 10-тан итэҕэһэ суох биэс уонна онтон элбэх оҕолоох ийэ оҕону иитиигэ уһулуччу ситиһиилэрин, куорат уопсастыбаннай олоҕор сүҥкэн кылааттарын иһин бэлиэтэнэр. Наҕараада бастаан олохтоноругар биир кэмнээх төлөбүрүн кээмэйэ 15 000 солк. этэ. Куорат Дууматын 2024 сыл сэтинньи 27 күнүнээҕи РЯГД-10-10 быһаарыытынан төлөбүр кээмэйэ 50 000 солк. диэри үрдэтиллибитэ.

Дьокутааттар бу сууманы билигин 100 000 солк. диэри үрдэтэргэ этии киллэрбиттэрэ.