1№-дээх оскуола саҥа дьиэтэ 105 сыллаах үбүлүөйүн көрсө үлэҕэ киириэҕэ
Тохсунньу 9 күнүгэр Ил Дархан Айсен Николаев баһылыктаах хамыыһыйа тутуу 2026 сыл сааһыгар үлэҕэ киирэргэ бэлэмин быһаарда.
Эбийиэк 6 тыһыынчаттан тахса кв.миэтэрэ иэннээх, 4 мэндиэмэннээх, биир симиэнэҕэ 253 миэстэлээх. Тутууну «Сахаспецмонтаж-95» ХЭУо ыытар.
Ил Дархан Айсен Николаев иһитиннэрбитинэн, оскуола Дьокуускай куорат маастар-былаанын олоххо кэллэриигэ бэриллэр субсидия суотугар тутуллар уонна 105 сыллаах үбүлүөйүгэр дьоһун бэлэх буолуоҕа.
Оскуола дириэктэрэ Таисия Горохова бэлиэтээбитинэн, оскуола доруобуйа харыстабылын хайысхатынан үлэлиир буолан, Арассыыйа киин медицинскэй үрдүк үөрэх кыһаларын уонна М.К. Аммосов аатынан ХИФУ Мединститутун Дьоҕус медицинскэй академиятын кытта бииргэ үлэлэһэр былааннаах, диэн Ил Дархан уонна Бырабыыталыстыба пресс-сулууспата иһитиннэрэр.
Санатар буоллахха, тутуу Арассыыйа бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев сорудаҕынан саҕаламмыта уонна 2025 сыл күһүнүгэр үлэҕэ киириэхтээх этэ.
Хаартыска: Андрей Сорокин, СИА
Сонуннар
Ордук ааҕаллар
